Pune Crime: सोशल मीडियाच्या झगमगाटात ज्यांच्या लग्नाची चर्चा झाली, त्याच नात्याचा अंत आता रक्ताच्या थारोळ्यात होताना दिसत आहे. पुण्यातील खडकी परिसरात एका पतीने आपल्या पत्नीवर धारदार शस्त्राने सपासप वार करून तिला जीवे मारण्याचा प्रयत्न केला. घटस्फोटाच्या वादातून ही खळबळजनक घटना घडली असून, पोलिसांनी पती राहुल महादेव कांबळे (३०) याला बेड्या ठोकल्या आहेत.
नेमकी घटना काय?
आरोपी राहुल कांबळे आणि जखमी सायली भिसे (२२) यांचा विवाह काही महिन्यांपूर्वी आळंदी येथे थाटामाटात पार पडला होता. त्यांच्या लग्नाचा व्हिडिओ सोशल मीडियावर तुफान व्हायरल झाला होता. मात्र, संसाराची ही गाडी फार काळ टिकली नाही. लग्नानंतर अवघ्या काही दिवसांतच दोघांमध्ये खटके उडू लागले आणि प्रकरण घटस्फोटापर्यंत पोहोचले. सध्या शिवाजीनगर न्यायालयात त्यांचा कायदेशीर लढा सुरू आहे.
हल्ल्याचा थरार:
१४ एप्रिलच्या रात्री सायली आपल्या मैत्रिणीसोबत डॉ. बाबासाहेब आंबेडकर जयंतीचा उत्साह पाहून घरी परतत होती. याच संधीचा फायदा घेत राहुलने तिला औंध रोड परिसरात गाठले. घटस्फोटाच्या कागदपत्रांवर सही करण्यावरून त्यांच्यात बाचाबाची झाली. रागाच्या भरात राहुलने सायलीवर धारदार शस्त्राने हल्ला केला. त्याने तिच्या कपाळावर, गालावर, खांद्यावर आणि ओठांवर गंभीर वार केले.
पीडितेचा पोलिसांच्या भूमिकेवर संताप
या घटनेनंतर जखमी सायलीने पोलिसांच्या कार्यपद्धतीवर गंभीर प्रश्नचिन्ह उपस्थित केले आहे. तिने आरोप केला की, पोलिसांनी आरोपीला ताब्यात घेतले असले तरी, त्याच्यावर कडक कलमे लावण्यात आलेली नाहीत. गुन्हा दाखल करूनही तपासात दिरंगाई होत असून आरोपीला कोणाचे तरी पाठबळ मिळत असल्याची भीती तिने व्यक्त केली. “न्याय मिळण्याऐवजी मला पोलिसांच्या भूमिकेमुळे असुरक्षित वाटत आहे,” अशा शब्दांत तिने आपला संताप व्यक्त केला.
वादाचे मुख्य कारण
मिळालेल्या माहितीनुसार, राहुलला घटस्फोट हवा नव्हता. याच कारणावरून तो सायलीवर दबाव टाकत होता. या वादाचे रूपांतर शेवटी हिंसक हल्ल्यात झाले. खडकी पोलीस सध्या या प्रकरणाचा सखोल तपास करत असून, पीडितेच्या आरोपांनंतर पोलीस आता काय पावले उचलतात, याकडे सर्वांचे लक्ष लागले आहे.
