Sangli Crime: ज्या हातांनी चालायला शिकले, त्याच हातांनी जन्मदात्रीचा श्वास रोखल्याची काळीज पिळवटून टाकणारी घटना सांगलीतील मानमोडी (ता. मिरज) येथे घडली आहे. घरातील किरकोळ वाद आणि पत्नीला घरात घेण्यावरून झालेल्या वादाचे पर्यवसान एका भीषण हत्येत झाले. आईचे तोंड दाबून पोटच्या मुलानेच तिचा खून केल्याचे समोर आले असून, या घटनेने परिसरात संतापाची लाट उसळली आहे.
आईचा विरोध ठरला मृत्यूला निमंत्रण
मयत संगीता जीवन झेंडे (५१) आणि त्यांचा मुलगा जगदीश जीवन झेंडे हे मानमोडी येथे एकत्र राहत होते. जगदीशची पत्नी सोनाली हिच्याशी त्याचे पटत नसल्याने किंवा इतर कौटुंबिक कारणांमुळे ती माहेरी राहत होती. जगदीशला आपल्या पत्नीला पुन्हा घरी आणायचे होते, मात्र आई संगीता यांचा या गोष्टीला तीव्र विरोध होता. पत्नीला घरात स्थान देण्यावरून माय-लेकात गेल्या अनेक दिवसांपासून ठिणगी पडली होती.
मध्यरात्री काळजाचा थरार
बुधवारी मध्यरात्री याच विषयावरून घरात पुन्हा वाद झाला. रागाच्या भरात जगदीशचे भान सुटले. पत्नीच्या ओढीपोटी त्याने आईच्या नाका-तोंडावर दाब देऊन तिचा श्वास कोंडला. प्रतिकार करण्याची संधी मिळण्यापूर्वीच संगीता यांचा मृत्यू झाला. गुरुवारी सकाळी हा प्रकार उघडकीस येताच गावकऱ्यांच्या पायाखालची जमीन सरकली.
पोलिसी खाक्या दाखवताच मुलाची कबुली
घटनेची माहिती मिळताच कुपवाड पोलीस ठाण्याचे अधिकारी आनंदराव घाडगे पथकासह घटनास्थळी दाखल झाले. सांगलीचे उपविभागीय पोलीस अधिकारी संदीप भागवत यांनीही तपासाच्या सूचना दिल्या. सुरुवातीला संशयित जगदीश पोलिसांची दिशाभूल करण्याचा प्रयत्न करत होता, मात्र पोलिसांनी सखोल चौकशी आणि पोलिसी खाक्या दाखवताच त्याने गुन्हा कबूल केला.
