Sahar Shaikh : ठाणे महापालिकेतील मुंब्रा प्रभागातून निवडून आलेल्या सहर शेख यांच्या अडचणीत वाढ होण्याची शक्यता आहे. निवडणूक लढवताना शासकीय यंत्रणांची दिशाभूल करून बनावट जात प्रमाणपत्र मिळवल्याचा गंभीर आरोप त्यांच्यावर करण्यात आला आहे.
AIMIM च्या नगरसेविका असलेल्या सहर शेख यांनी मुंबई शहर जिल्हाधिकारी कार्यालयातून जात प्रमाणपत्र घेतल्याचे समोर आले आहे. मात्र हे प्रमाणपत्र मिळवताना अधिकाऱ्यांची दिशाभूल केल्याची तक्रार दाखल झाली असून या प्रकरणाची चौकशी सुरू आहे.
तक्रारदारांच्या म्हणण्यानुसार, सहर शेख यांच्या वडिलांनी स्थलांतरितांसाठी लागू असलेल्या नमुन्याऐवजी वेगळा नमुना वापरून बनावट कागदपत्रांच्या आधारे प्रमाणपत्र मिळवले. त्यानंतर सहर शेख यांनी त्या प्रमाणपत्रावर ठाणे महापालिका निवडणूक लढवून विजय मिळवला.
या प्रकरणी संबंधित कागदपत्रांची पडताळणी करण्यासाठी तक्रार दाखल करण्यात आली असून अधिकाऱ्यांकडून सुनावण्या घेण्यात आल्या आहेत. तपासादरम्यान जात प्रमाणपत्रातील काही त्रुटीही निदर्शनास आल्या असल्याचे सांगितले जात आहे.
दरम्यान, या प्रकरणामुळे सहर शेख यांच्या नगरसेवक पदावर गंडांतर येण्याची शक्यता व्यक्त केली जात आहे. या संदर्भात त्यांच्याशी संपर्क साधण्याचा प्रयत्न झाला असला तरी त्यांच्याकडून अद्याप कोणतीही अधिकृत प्रतिक्रिया आलेली नाही.
जानेवारी 2026 मधील निवडणुकीत सहर शेख यांनी मुंब्रा प्रभाग क्रमांक 30 मधून विजय मिळवत राजकारणात दमदार एन्ट्री केली होती. मात्र आता या वादामुळे त्यांच्या राजकीय भवितव्यावर प्रश्नचिन्ह निर्माण झाले आहे.
