नवी दिल्ली: बिहारमध्ये यशस्वीरीत्या पूर्ण झालेल्या विशेष सघन पुनरीक्षण (Special Intensive Revision – SIR) प्रक्रियेनंतर, आता निवडणूक आयोग देशभरात तिचा दुसरा टप्पा सुरू करणार आहे. मुख्य निवडणूक आयुक्त ज्ञानेश कुमार यांनी जाहीर केले की, २८ ऑक्टोबरच्या मध्यरात्री १२ वाजल्यापासून एसआयआरचा दुसरा टप्पा सुरू होईल. ही प्रक्रिया नऊ राज्ये आणि तीन केंद्रशासित प्रदेशांमध्ये राबविण्यात येणार असून, यामध्ये मतदार यादीतील अपात्र नावे काढून टाकणे आणि पात्र मतदारांना समाविष्ट करणे हा प्रमुख उद्देश असेल.
ज्ञानेश कुमार यांनी सांगितले की, देशात शेवटची एसआयआर प्रक्रिया २००४ मध्ये झाली होती. दोन दशकांनंतर मतदार यादींची अचूकता आणि पारदर्शकता सुनिश्चित करण्यासाठी ही मोहीम राबविली जात आहे. आयोगानुसार, यावेळी ५१ कोटी मतदारांची माहिती पुनर्पडताळणीसाठी घेतली जाईल. निवडणूक आयुक्तांनी स्पष्ट केले की, बीएलओ (Booth Level Officers) प्रत्येक घराला तीन वेळा भेट देतील. ते मतदारांची नावे तपासतील, आवश्यक फॉर्म देतील आणि नवीन नोंदी स्वीकारतील. जे मतदार दिवसभर बाहेर असतात त्यांना ऑनलाइन माध्यमातून त्यांची नावे नोंदवता येतील.
मतदान केंद्रांची संख्या वाढणार
पहिल्या टप्प्यात मतदारांना कोणतेही कागदपत्र सादर करण्याची गरज नाही. फक्त २००३ च्या मतदार यादीत आपले किंवा पालकांचे नाव असल्याचे नमूद करावे लागेल. ही यादी निवडणूक आयोगाच्या अधिकृत संकेतस्थळावर उपलब्ध असेल. या मोहिमेमुळे मतदान केंद्रांची रचना देखील बदलणार आहे. प्रत्येक बूथवर आता १,००० पेक्षा जास्त मतदार नोंदवले जाणार नाहीत, अशी माहिती ज्ञानेश कुमार यांनी दिली. त्यामुळे नवीन मतदार यादीनंतर अनेक ठिकाणी अतिरिक्त मतदान केंद्रांची निर्मिती केली जाईल. निवडणूक आयोगानुसार, ही मोहीम देशातील मतदान प्रणाली अधिक पारदर्शक, अचूक आणि विश्वासार्ह बनविण्याच्या दिशेने एक महत्त्वाचे पाऊल ठरणार आहे.
