IRCTC Down: सणासुदीच्या काळात लाखो प्रवासी आपल्या प्रवासाचे नियोजन करत असताना, शुक्रवारी सकाळी भारतीय रेल्वे केटरिंग अँड टुरिझम कॉर्पोरेशन (IRCTC) ची वेबसाइट आणि मोबाइल अॅप अचानक बंद पडल्याने मोठी गैरसोय निर्माण झाली. काही तासांसाठी वेबसाइट किंवा अॅपद्वारे तिकीट बुकिंग करणे अशक्य झाले होते.
तात्काळ तिकिटे अडकली, प्रवाशांचा संताप
या तांत्रिक बिघाडामुळे तात्काळ आणि प्रीमियम तात्काळ तिकीट बुकिंगमध्ये व्यत्यय आला, ज्यामुळे हजारो प्रवाशांना समस्यांना तोंड द्यावे लागले. दिवाळी आणि छठसारख्या मोठ्या सणांपूर्वी तिकीट आरक्षणावर ताण वाढलेला असताना ही अडचण निर्माण झाल्याने प्रवाशांच्या प्रवासयोजनाच विस्कळीत झाल्या.
सोशल मीडियावर प्रवाशांचा रोष
आयआरसीटीसी वेबसाइट बंद पडल्याची माहिती समजताच सोशल मीडियावर प्रवाशांचा संताप उसळला. एका प्रवाशाने ‘X’ (पूर्वीचे ट्विटर) वर लिहिले, ‘बुकिंगचा पीक टाइम आहे आणि सर्व्हर बंद आहे, हा उत्सवाचा हंगाम आहे. कोणालाच काळजी नाही, आणि ११ वर्षांनंतरही प्रणालीत काही बदल नाही.’ तर दुसऱ्या एका वापरकर्त्याने लिहिले, ‘प्रत्येक तात्काळ बुकिंगच्या दिवशी आयआरसीटीसी सर्व्हर क्रॅश होतो. एजंट आणि बुकिंग माफिया क्षणार्धात सर्व तिकिटे घेतात, सामान्य प्रवाशांना काहीच मिळत नाही.’
Ye haalat hai IRCTC ki. Peak booking time and server is down, festival season @AshwiniVaishnaw @IRCTCofficial @RailMinIndia @narendramodi @smitaprakash @ShivAroor Nobody cares, Still no solid solution after 11 yrs of current govt. @theskindoctor13 pic.twitter.com/GZSW85foSK
— avinash kumar (@ironyish) October 17, 2025
वेबसाइटवर ‘डाउनटाइम’ संदेश
वेबसाइट उघडताच प्रवाशांना डाउनटाइम मेसेज दिसत आहे. ‘पुढील तासासाठी या साइटवर बुकिंग आणि रद्द करण्याची सेवा उपलब्ध नाही. गैरसोयीबद्दल क्षमस्व.’ टीडीआर दाखल करण्यासाठी ग्राहकांना 14646, 08044647999, 08035734999 या क्रमांकांवर कॉल करण्यास किंवा etickets@irctc.co.in या ईमेलवर संपर्क साधण्यास सांगण्यात येत आहे.
तांत्रिक कारण अद्याप अस्पष्ट
आयआरसीटीसीकडून या तांत्रिक बिघाडाचे अधिकृत कारण अद्याप जाहीर केलेले नाही. मात्र, तज्ञांच्या मते, सणासुदीच्या काळात वाढलेल्या ट्रॅफिकमुळे सर्व्हरवर ओव्हरलोड झाल्याने प्रणाली बंद पडली असावी. गेल्या वर्षीही दिवाळीपूर्वी अशीच समस्या निर्माण झाली होती, ज्यामुळे हजारो प्रवाशांना मोठा त्रास सहन करावा लागला होता.
प्रवाशांमध्ये चिंता कायम
सणासुदीच्या गर्दीत तिकीट मिळवणे आधीच अवघड असताना, वेबसाइट आणि अॅप ठप्प झाल्याने प्रवाशांमध्ये निराशा आणि असंतोष वाढला आहे. प्रवाशांनी आयआरसीटीसीकडून स्थायी उपाययोजना आणि सर्व्हर क्षमता वाढवण्याची मागणी केली आहे.
