नवी मुंबई: बडतर्फ प्रोबेशनरी IAS अधिकारी पूजा खेडकर यांच्या पालकांविरुद्ध नवी मुंबई पोलिसांनी लूकआउट सर्क्युलर जारी केला आहे. पोलीस सध्या पूजा यांचे वडील दिलीप खेडकर आणि आई मनोरमा खेडकर यांचा शोध घेत आहेत, जे गेल्या नऊ दिवसांपासून फरार आहेत. या प्रकरणाशी संबंधित एका अज्ञात व्यक्तीचा शोध देखील पोलिस घेत आहेत. दरम्यान, खेडकर कुटुंबाचा ड्रायव्हर-कम-बॉडीगार्ड प्रफुल्ल साळुंखे पोलिस कोठडीत आहे.
पोलिसांनी दिलेल्या माहितीनुसार, नवी मुंबई आणि पुणे पोलिसांनी मनोरमा खेडकर यांच्या पुणे येथील घराला चौकशीसाठी भेट दिली त्या दिवशीच दिलीप, मनोरमा आणि त्यांचा अंगरक्षक फरार झाले. सुरुवातीला दिलीप आणि अंगरक्षक लँड क्रूझर गाडीतून पळून गेले, तर मनोरमा खेडकर सुमारे 30 मिनिटांनी घटनास्थळ सोडले. अंदाजे दुपारी 12 ते 3 वाजेच्या दरम्यान तिघेही आरोपी फरार झाले.
पोलिसांच्या अंदाजानुसार, दिलीप आणि त्यांचा अंगरक्षक पुण्याहून अहमदनगरकडे निघाले. दिलीप खेडकर यांनी अंगरक्षकाला गाडीतून उतरवले आणि स्वतः लँड क्रूझरने फरार झाले. त्यानंतर अंगरक्षक थेट धुळे येथे पोहोचला. पोलिसांना संशय आहे की, दिलीप खेडकर गाडी कुठेतरी लपवून फरार आहेत.
पोलिसांनी दिलीप खेडकर यांच्याविरुद्ध ट्रक क्लीनर अपहरणाचा गुन्हा नोंदवला आहे, तर मनोरमा खेडकर यांच्याविरुद्ध सरकारी कामात अडथळा आणणे आणि पुरावे नष्ट करणे या गुन्ह्याची नोंद केली आहे. खेडकर कुटुंबाच्या पुण्यातील घराला चौकशीसाठी भेट दिली असता, पोलिसांना अपहरणात वापरलेली गाडी सापडली. तथापी, पोलिस चौकशीसाठी गेले असता मनोरमा खेडकर यांनी पोलिसांवर कुत्रे सोडण्याचा प्रयत्न केल्याचा आरोप करण्यात आला आहे. सध्या पोलीस खेडकर कुटुंबीयांचा शोध घेत आहेत.
