Mumbai-Pune Missing Link: मुंबई आणि पुणे या दोन महानगरांना अधिक जवळ आणणाऱ्या बहुप्रतिक्षीत ‘मिसिंग लिंक’ प्रकल्पाचा लोकार्पण सोहळा आज दिमाखात पार पडला. मुख्यमंत्री आणि दोन्ही उपमुख्यमंत्र्यांच्या उपस्थितीत हा मार्ग प्रवाशांसाठी खुला करण्यात आला. यावेळी मुख्यमंत्री देवेंद्र फडणवीस यांनी या प्रकल्पाचा उल्लेख ‘मिसिंग लिंक नव्हे, तर कनेक्टिंग लिंक’ असा केला.
एकाच कारमध्ये मुख्यमंत्री अन् उपमुख्यमंत्री; मुख्यमंत्र्यांनी साभाळले स्टिअरिंग
उद्घाटनानंतर एक आगळेवेगळे दृश्य पाहायला मिळाले. मुख्यमंत्री आणि दोन्ही उपमुख्यमंत्री एकाच कारमधून या नवीन मार्गावर स्वार झाले. विशेष म्हणजे, खुद्द मुख्यमंत्र्यांनी गाडी चालवत या आधुनिक मार्गावरून प्रवासाचा अनुभव घेतला. प्रवासादरम्यान त्यांनी बोगद्यांमधील अद्ययावत सुरक्षा यंत्रणेची आणि कामाच्या दर्जाची पाहणी केली.
गिनीज बुक ऑफ वर्ल्ड रेकॉर्डमध्ये नोंद
या प्रकल्पाने लोकार्पणापूर्वीच जागतिक पातळीवर आपली मोहोर उमटवली आहे. या प्रकल्पातील बोगदा तब्बल 23.5 मीटर रुंद असून, तो जगातील सर्वाधिक रुंदीचा बोगदा ठरला आहे. या विक्रमाची नोंद ‘गिनीज बुक ऑफ वर्ल्ड रेकॉर्ड’मध्ये करण्यात आली असून, सोहळ्यादरम्यान त्याचे अधिकृत प्रमाणपत्र सुपूर्द करण्यात आले.
प्रवाशांना काय फायदा होणार?
- वेळेची बचत: लोणावळा घाटातील अवघड वळणे आता इतिहास जमा होणार असून, प्रवासाचा वेळ सुमारे 30 मिनिटांनी कमी होणार आहे.
- सुरक्षित प्रवास: चढ-उतार आणि वाहतूक कोंडी टाळता येणार असल्याने प्रवास अधिक वेगवान आणि सुरक्षित होईल.
- अभियांत्रिकीचा आविष्कार: टायगर व्हॅलीवरील भव्य केबल-स्टेड पूल आणि अवाढव्य बोगदे हे भारतीय अभियांत्रिकीचे उत्कृष्ट उदाहरण ठरले आहेत.
प्रकल्पाचा प्रवास
2019 मध्ये सुरू झालेला हा महत्त्वाकांक्षी प्रकल्प अनेक आव्हाने पार करून आज पूर्णत्वास आला आहे. या नवीन दुव्यामुळे इंधनाची बचत होणार असून, दोन्ही शहरांमधील दळणवळणाला मोठी गती मिळणार आहे. आजपासून हा मार्ग सर्वसामान्यांच्या सेवेत दाखल झाला असून, यामुळे मुंबई-पुणे एक्स्प्रेसवेवरील वाहतुकीचे चित्र पूर्णपणे बदलणार आहे.
