Pimpri-Chinchwad News: समाजाच्या भीतीपोटी लपवलेले गुपित अखेर एका २२ वर्षीय तरुणी आणि तिच्या नवजात बाळाच्या जिवावर बेतले आहे. पिंपरी-चिंचवडमधील चिंचवडे नगर परिसरात एक अत्यंत वेदनादायक घटना समोर आली असून, घरीच प्रसूती झाल्यानंतर योग्य वैद्यकीय उपचार न मिळाल्याने माता आणि बालक या दोघांचाही मृत्यू झाला आहे.
नेमकी काय आहे घटना?
मिळालेल्या माहितीनुसार, संबंधित तरुणी अविवाहित होती आणि तिने आपले गरोदरपण कुटुंबीयांपासून लपवून ठेवले होते. मंगळवारी (२४ मार्च) सकाळी तिला प्रसूती कळा सुरू झाल्या आणि घरातच तिचे बाळंतपण झाले. मात्र, प्रसूतीनंतर तिची प्रकृती कमालीची खालावली. तिला तातडीने रावेतमधील खासगी रुग्णालयात आणि त्यानंतर पुण्यातील ससून रुग्णालयात हलवण्यात आले.
दुसरीकडे, नवजात बाळाची प्रकृतीही चिंताजनक असल्याने त्याला वायसीएम (YCM) रुग्णालयात दाखल करण्यात आले. मात्र, काळाचा घाला इतका क्रूर होता की, उपचारादरम्यान सायंकाळी आधी बाळाचा आणि त्यानंतर काही वेळातच मातेचाही मृत्यू झाला. या घटनेने परिसरात हळहळ व्यक्त होत असून चिंचवड पोलीस प्रकरणाचा सखोल तपास करत आहेत.
