Nasrapur Case : पुण्यातील नसरापूर येथील साडेतीन वर्षांच्या चिमुकलीवर झालेल्या अत्याचार आणि हत्येच्या घटनेने संपूर्ण देश सुन्न झाला आहे. याप्रकरणी ससून रुग्णालयाचा प्राथमिक शवविच्छेदन (Post-Mortem) अहवाल समोर आला असून, त्यातील तपशील अत्यंत अमानुष आणि संतापजनक आहेत. ६५ वर्षीय नराधम भीमराव कांबळे याने चिमुकलीसोबत केलेल्या क्रूरतेची सीमा ओलांडल्याचे या अहवालातून स्पष्ट झाले आहे.
मृत्यूची खात्री करण्यासाठी छातीवर प्रहार
वैद्यकीय अहवालातील सर्वात धक्कादायक बाब म्हणजे, आरोपीने चिमुकलीच्या मृत्यूबद्दल खात्री करण्यासाठी तिच्या छातीवर जोरात बुक्की मारली होती. नराधमाने केवळ अत्याचार करूनच थांबला नाही, तर मुलगी जिवंत आहे की मेली हे पाहण्यासाठी त्याने तिच्यावर शारीरिक प्रहारही केले.
अत्याचाराचा क्रूर प्रकार
आरोपीने चिमुकलीच्या तोंडात पायमोजा आणि कपड्याचा बोळा कोंबला होता. तसेच तिचे नाक आणि तोंड दाबल्यामुळे श्वास गुदमरून तिचा मृत्यू झाला. चिमुकलीच्या चेहऱ्यावर ओरखड्यांच्या खुणा आढळल्या आहेत. तसेच तिच्या गुप्तांगाला गंभीर इजा झाल्याचेही वैद्यकीय तपासणीत निष्पन्न झाले आहे. नराधमाने पीडितेला ज्या गोठ्यात नेले होते, तिथेच तिच्यावर नरक यातना लादल्या.
पुढील तपास आणि अंतिम अहवाल
ससून रुग्णालयातील तज्ज्ञांनी ‘इन कॅमेरा’ पद्धतीने ही उत्तरीय तपासणी पूर्ण केली आहे. प्राथमिक अहवाल पोलिसांना सोपवण्यात आला असून, अधिक सखोल तपासासाठी चिमुकलीचे अंतर्गत अवयव (Viscera) न्यायसहायक वैज्ञानिक प्रयोगशाळेत (FSL) पाठवण्यात आले आहेत. लॅबचा अहवाल प्राप्त झाल्यानंतर ससून रुग्णालय पोलिसांना अंतिम अहवाल सादर करेल.
आरोपीवर कठोर कारवाईची मागणी
या प्राथमिक अहवालामुळे आरोपी भीमराव कांबळेविरुद्धचा पुरावा अधिक भक्कम झाला आहे. पोलिसांनी या अहवालाच्या आधारे तपासाची चक्रे वेगाने फिरवली असून, अशा नराधमाला कठोरतम शिक्षा व्हावी, अशी मागणी सर्वस्तरातून होत आहे.
