Suvendu Adhikari: पश्चिम बंगालच्या राजकीय इतिहासात आज एका नव्या अध्यायाची सुरुवात झाली आहे. भारतीय जनता पक्षाच्या विधिमंडळ पक्षाच्या बैठकीत सुवेंदू अधिकारी यांची नेतेपदी एकमताने निवड करण्यात आली असून, ते राज्याचे पहिले भाजप मुख्यमंत्री म्हणून धुरा सांभाळतील. २९३ पैकी तब्बल २०७ जागांवर ऐतिहासिक विजय मिळवून भाजपने बंगालमध्ये सत्तांतर घडवून आणले आहे.
शाह आणि माझी यांच्या उपस्थितीत शिक्कामोर्तब
कोलकाता येथे पार पडलेल्या या महत्त्वपूर्ण बैठकीला केंद्रीय गृहमंत्री अमित शाह आणि ओडिशाचे मुख्यमंत्री मोहन माझी यांची विशेष उपस्थिती होती. प्रदेशाध्यक्ष समिक भट्टाचार्य यांनी सुवेंदू अधिकारी यांच्या नावाचा प्रस्ताव मांडला, ज्याला सर्व नवनिर्वाचित आमदारांनी एकमुखाने पाठिंबा दिला.
अमित शाह यांचा ‘दीदीं’वर निशाणा
विजयी सोहळ्याला संबोधित करताना अमित शाह म्हणाले की, “हा विजय अभूतपूर्व आहे. राज्यातील २३ जिल्ह्यांपैकी ९ जिल्ह्यांमध्ये तृणमूल काँग्रेसला खातेही उघडता आले नाही, हा जनमताचा मोठा कौल आहे. आता आम्ही बंगालच्या सीमा एका अभेद्य किल्ल्यासारख्या सुरक्षित करू आणि ‘सोनार बांगला’चे स्वप्न सत्यात उतरवू.” विशेषतः भवानीपूरच्या मतदारांनी दिलेल्या प्रतिसादाबद्दल त्यांनी कृतज्ञता व्यक्त केली.
राजकीय वारसा आणि समर्पण
माजी केंद्रीय मंत्री शिशिर अधिकारी यांचे पुत्र असलेल्या सुवेंदू यांनी आपले संपूर्ण आयुष्य समाजकार्यासाठी समर्पित केले आहे. अविवाहित राहिलेल्या अधिकारी यांच्या कुटुंबात त्यांचे दोन्ही भाऊ, दिब्येंदू आणि सौम्येंदू हे देखील राजकारणात सक्रिय आहेत. दरम्यान, सुवेंदू अधिकारी यांचा शपथविधी सोहळा उद्या, शनिवारी सकाळी ११:०० वाजता पार पडणार आहे.
