Elvish Honey Scam: तथाकथित आध्यात्मिक गुरू अशोक खरात याच्या फसवणुकीचे जाळे किती खोलवर पसरले आहे, याचा प्रत्यय देणारे नवनवीन खुलासे पोलीस तपासात होत आहेत. बनावट खडे आणि चिंचुके विकून भाविकांना लुटल्यानंतर, आता खरातने ‘तुर्की मध’ (Turkish Honey) विकून कोट्यवधींचा गंडा घातल्याची धक्कादायक माहिती समोर आली आहे.
काय आहे ‘एल्विश हनी’चा बनाव?
तपासातून मिळालेल्या माहितीनुसार, अशोक खरात हा तुर्कीतील समुद्राच्या खोल गुहांमध्ये मिळणारे ‘एल्विश हनी’ आपल्याकडे असल्याचे भासवत असे. हे मध अत्यंत दुर्मिळ असून ते शारीरिक शक्ती वाढवण्यासाठी आणि लैंगिक समस्यांवर रामबाण उपाय असल्याचा दावा तो करत असे. एका किलोच्या बाटलीसाठी तो तब्बल ९ लाख रुपये उकळत होता. प्रामुख्याने मोठे उद्योजक आणि राजकीय नेत्यांना आपल्या जाळ्यात ओढून तो या मधाची विक्री करत असे.
पैशांची अफरातफर आणि काळा पैसा
केवळ फसवणूकच नाही, तर या माध्यमातून गोळा झालेला अवाढव्य पैसा आपल्या ट्रस्टच्या नावावर जमा करून खरातने ‘मनी लॉन्डरिंग’ केल्याचा संशय तपास यंत्रणांनी व्यक्त केला आहे. लोकांच्या अंधश्रद्धेचा आणि हतबलतेचा फायदा घेत त्याने आर्थिक गुन्हेगारीचे मोठे साम्राज्य उभे केल्याचे आता स्पष्ट होत आहे.
महिलांचे शोषण आणि अत्याचाराचे सत्र
अशोक खरातचा क्रूर चेहरा केवळ आर्थिक फसवणुकीपुरता मर्यादित नाही. तांत्रिक विधी, भविष्य सांगणे किंवा लग्नाचे योग जुळवून देण्याच्या बहाण्याने त्याने अनेक महिलांवर अत्याचार केल्याचे समोर आले आहे. सध्या त्याच्यावर ६ गुन्हे दाखल असून नवीन ३ तक्रारींची भर पडली आहे. तक्रारदारांमध्ये एका विद्यार्थिनीचाही समावेश असून, खरातने तिच्याशी अत्यंत निंदनीय गैरवर्तन केल्याचे उघड झाले आहे.
आज न्यायालयीन सुनावणी
अशोक खरातची पोलीस कोठडी आज संपत असल्याने त्याला पुन्हा न्यायालयात हजर केले जाणार आहे. पोलीस या प्रकरणातील अधिक धागेदोरे शोधण्यासाठी कोठडी वाढवून मिळण्याची मागणी करण्याची शक्यता आहे. खरातच्या या कृष्णकृत्यांमुळे नाशिक परिसरात मोठी खळबळ उडाली असून, न्यायालय काय निर्णय देते याकडे सर्वांचे लक्ष लागले आहे.
