Pune ZP Election Result 2026 : राज्याच्या सत्तेचे केंद्र असलेल्या पुणे जिल्ह्याच्या ग्रामीण राजकारणात पुन्हा एकदा राष्ट्रवादी काँग्रेसने आपली ताकद दाखवून दिली आहे. ७ फेब्रुवारीला झालेल्या मतदानानंतर आज पार पडलेल्या मतमोजणीत, उत्तर पुण्यात राष्ट्रवादीने जोरदार मुसंडी मारत भारतीय जनता पक्षाच्या आक्रमक आव्हानाला लगाम घातला आहे. ७३ जागांपैकी तब्बल ३६ जागांवर आघाडी घेत राष्ट्रवादीने ‘मिनी मंत्रालया’वर आपले वर्चस्व जवळपास निश्चित केले आहे.
अजितदादांच्या निधनानंतरची पहिली कसोटी; ‘राष्ट्रवादी’ची एकजूट यशस्वी
अजित पवार यांच्या अकाली निधनानंतर पुण्यात ही पहिलीच महत्त्वाची निवडणूक पार पडली. या निवडणुकीत राष्ट्रवादीच्या दोन्ही गटांनी एकत्रितपणे दिलेली झुंज यशस्वी ठरताना दिसत आहे. विशेषतः जुन्नर, आंबेगाव, मावळ आणि खेड या तालुक्यांत राष्ट्रवादीने टपाली मतदानापासूनच मोठी आघाडी घेतली. भाजपने या भागात प्रतिष्ठा पणाला लावली होती, मात्र प्राथमिक निकाल त्यांच्यासाठी धक्कादायक ठरले आहेत.
पक्षनिहाय सद्यस्थिती: कुणाचे किती पारडे जड? (एकूण जागा – ७३)
सकाळी ११ वाजेपर्यंत हाती आलेल्या आकडेवारीनुसार पुण्याचा कौल असा आहे:
- राष्ट्रवादी काँग्रेस: ३६ जागा (आघाडीवर)
- भारतीय जनता पक्ष: १७ जागा
- शिवसेना (शिंदे गट): १२ जागा
- राष्ट्रवादी (शरद पवार गट): ०५ जागा
- शिवसेना (ठाकरे गट): ०२ जागा
- काँग्रेस: ०१ जागा
पंचायत समित्यांतही ‘राष्ट्रवादी’चा बोलबाला
जिल्हा परिषदेपाठोपाठ १४६ जागांच्या पंचायत समिती निवडणुकीतही राष्ट्रवादीने आपला दबदबा कायम राखला आहे. राष्ट्रवादीने तब्बल ७२ जागांवर आघाडी मिळवून निम्म्या जागांवर दावा केला आहे. भाजपने ४८ जागांवर आघाडी घेत कडवी झुंज दिली असली तरी सत्तेचा आकडा गाठताना त्यांची दमछाक होताना दिसत आहे. या निवडणुकीत सर्वात मोठा फटका काँग्रेसला बसला असून केवळ एका जागेवर त्यांना समाधान मानावे लागले आहे. पुण्याच्या ग्रामीण पट्ट्यात राष्ट्रवादीची मुळं किती खोलवर आहेत, हे या निकालाने पुन्हा एकदा अधोरेखित केले आहे. प्रशासक राज संपवून पुन्हा लोकप्रतिनिधींचा कारभार सुरू होत असताना पुणेकरांनी अनुभवी हातांनाच पसंती दिल्याचे स्पष्ट होत आहे.
