Rohit Pawar: पुरंदर येथे राज्याचे मंत्री छगन भुजबळ यांचे हेलिकॉप्टर नियोजित हेलिपॅडऐवजी थेट कार पार्किंगमध्ये उतरवल्याची धक्कादायक घटना घडली आहे. या गंभीर प्रकारानंतर आमदार रोहित पवार यांनी ट्विट करत राज्य सरकारवर निशाणा साधला आहे. “आज केवळ नशिबामुळे छगन भुजबळ साहेबांचा अपघात टळला, पण शासनाने इतका हलगर्जीपणा करणे अत्यंत चुकीचे आहे,” अशा शब्दांत त्यांनी आपली संतापजनक प्रतिक्रिया नोंदवली आहे.
देखभालीवर प्रश्नचिन्ह
रोहित पवार यांनी आपल्या ट्विटमधून नेत्यांच्या हवाई प्रवासातील असुरक्षिततेकडे सर्वांचे लक्ष वेधले. छगन भुजबळ यांच्यासारख्या ज्येष्ठ नेत्याचे हेलिकॉप्टर तांत्रिक गोंधळामुळे पार्किंगमध्ये उतरवावे लागणे ही बाब सुरक्षेच्या दृष्टीने चिंताजनक असल्याचे त्यांनी म्हटले. अनेक सरकारी विमाने आणि हेलिकॉप्टर्सची देखभाल-दुरुस्ती वेळेवर होत नसल्याचा दावाही त्यांनी यावेळी केला. अशा परिस्थितीत महत्त्वाच्या व्यक्तींनी प्रवासासाठी वापरल्या जाणाऱ्या वाहनांची तांत्रिक स्थिती तपासणे गरजेचे असल्याचे त्यांनी नमूद केले.
मा. छगन भुजबळ साहेब यांच्यासारख्या मोठ्या नेत्याचं हेलीकॉप्टर हेलिपॅडऐवजी अचानक एका पार्किंगमध्ये उतरवण्यात आल्याची बाब ही अतिशय गंभीर आहे. त्यामुळंच मी सातत्याने सांगतोय की, महत्त्वाच्या व्यक्तींनी प्रवास करताना काळजी घ्यायला हवी. अनेक विमानं आणि हेलिकॉप्टरर्समध्ये…
— Rohit Pawar (@RRPSpeaks) April 11, 2026
सरकारला जबाबदारीची जाणीव करून देण्याचा प्रयत्न
लँडिंगचा व्हिडिओ व्हायरल झाल्यानंतर रोहित पवार यांनी सरकारला अधिक खबरदारी घेण्याचे आवाहन केले आहे. “आज मोठा अनर्थ टळला असला तरी, भविष्यात अशा चुकांची पुनरावृत्ती होऊ नये यासाठी सरकारने तातडीने उपाययोजना कराव्या,” अशी अपेक्षा त्यांनी व्यक्त केली. सुरक्षा नियमांचे पालन आणि विमानांच्या देखभालीबाबत सरकारने कडक पावले उचलावीत, अशी मागणी आता जोर धरत आहे. या घटनेमुळे राज्यातील अतिमहत्त्वाच्या व्यक्तींच्या (VVIP) हवाई प्रवासातील सुरक्षेचा प्रश्न पुन्हा एकदा ऐरणीवर आला असून, प्रशासकीय स्तरावर याचे काय पडसाद उमटतात, हे पाहणे महत्त्वाचे ठरेल.
