Radhakrishna Vikhe Patil: मराठा उपसमितीचे अध्यक्ष आणि राज्याचे राधाकृष्ण विखे पाटील यांनी आज मनोज जरांगे पाटील यांची भेट घेतली. यासाठी ते अंतरवाली सराटीत दाखल झाले आहे. 2 सप्टेंबरला मराठा आरक्षणासंदर्भात काढलेल्या शासन निर्णयावर दोघांमध्ये चर्चा होण्याची शक्यता वर्तवली जात आहे. एकीकडे राज्यभरामध्ये ओबीसी समाज मराठा आरक्षणासंदर्भात काढलेल्या जीआरला विरोध करत असताना दुसरीकडे मराठा आरक्षण उपसमितीचे अध्यक्ष विखे पाटील हे मनोज जरांगे यांच्या भेटीला अंतरवाली सराटीत दाखल झाल्याने विविध चर्चांना उधाण आले आहे.
राधाकृष्ण विखे पाटील आणि मनोज जरांगे
दरम्यान, राधाकृष्ण विखे पाटील आणि मनोज जरांगे पाटील या दोघांच्या भेटीमध्ये नक्की काय चर्चा होती हे पाहणं देखील महत्त्वाचं असणार आहे. दरम्यान, मनोज जरांगे पाटील यांनी मुंबईतील आझाद मैदानावर आमरण उपोषण केलं होतं. यानंतर सरकारनं त्यांच्या काही मागण्या मान्य केल्या होत्या. त्यानंतर जरांगे पाटील यांनी उपोषण मागे घेतले होते. उपोषण सोडल्यानंतर मनोज जरांगे पाटील यांच्यावर छत्रपती संभाजीनगरमधील रुग्णालयात उपचार सुरु होते.
त्यावेळी देखील राधाकृष्ण विखे पाटील यांनी रुग्णालयात जरांगे पाटीलयांची भेट घेऊन तब्बेतीची विचारपूस केली होती. मिळालेल्या माहितीनुसार राधाकृष्ण विखे पाटील आणि मनोज जरांगे यांच्यामध्ये पंधरा मिनिटांपासून बंद दाराआड चर्चा सुरु आहे.
