Chandrapur News: चंद्रपूर जिल्ह्यातून एक हृदयद्रावक घटना समोर आली आहे, जिथे लग्नाचा उत्साह अवघ्या काही क्षणातच शोकात बदलला. गोंडपिपरी तालुक्यातील ‘फुरदीहेटी’ गावात मित्राच्या लग्नासाठी आलेल्या 25 वर्षीय तरुणाचा डीजेच्या तालावर नाचत असताना अचानक मृत्यू झाला. अल्पेश दहागावकर असे या दुर्दैवी तरुणाचे नाव असून, या घटनेमुळे संपूर्ण गावात हळहळ व्यक्त केली जात आहे.
मस्करी करत असल्याचे वाटले, पण काळाने गाठले
मिळालेल्या माहितीनुसार, लग्नसमारंभात सर्वजण डीजेच्या तालावर उत्साहाने नाचत होते. अल्पेशही आपल्या मित्रांसोबत आनंद साजरा करण्यात मग्न होता. मात्र, नाचता नाचता तो अचानक जमिनीवर कोसळला. सुरुवातीला उपस्थितांना वाटले की अल्पेश काहीतरी मस्करी करत आहे किंवा थकव्यामुळे खाली बसला असावा. मात्र, बराच वेळ होऊनही त्याने कोणतीही हालचाल केली नाही, तेव्हा सर्वांच्या काळजाचा ठोका चुकला.
हृदयविकाराच्या झटक्याने ओढवला अंत?
घबरालेल्या मित्र आणि नातेवाईकांनी त्याला तातडीने गोंडपिपरी येथील सरकारी रुग्णालयात नेले. मात्र, डॉक्टरांनी तपासणीअंती त्याला मृत घोषित केले. प्राथमिक अंदाजानुसार, मृत्यूचे कारण हृदयविकाराचा झटका (Heart Attack) असल्याचे मानले जात आहे. प्रशासकीय अधिकाऱ्यांनी सांगितले की, शवविच्छेदन अहवाल प्राप्त झाल्यानंतरच मृत्यूचे नेमके कारण स्पष्ट होईल. पोलिसांनी याप्रकरणी ‘अपघाती मृत्यू’ची नोंद केली आहे.
तरुण वयात हृदयविकाराचे प्रमाण का वाढतेय?
अलीकडच्या काळात तरुणांमध्ये हृदयविकाराच्या झटक्याचे प्रमाण लक्षणीयरीत्या वाढले आहे. आरोग्य तज्ज्ञांच्या मते, बदललेली जीवनशैली, जंक फूडचे अतिसेवन, झोपेचा अभाव आणि वाढता मानसिक ताण ही यामागील प्रमुख कारणे आहेत. याव्यतिरिक्त धूम्रपान, मद्यपान आणि आनुवंशिक घटकांमुळेही ‘कार्डियाक अरेस्ट’चा धोका वाढतो. आनंदाच्या प्रसंगी अतिशारीरिक कष्ट किंवा मोठ्या आवाजाचा ताणही कधीकधी जीवावर बेतू शकतो, असे या घटनेवरून पुन्हा एकदा अधोरेखित झाले आहे.
