नांदेड : महाराष्ट्रात गुन्हेगारीच्या वाढत्या घटनांमध्ये आणखी एक धक्कादायक प्रकार समोर आला आहे. उपमुख्यमंत्री अजित पवार यांच्या राष्ट्रवादी काँग्रेस (अजित पवार गट)चे प्रदेश सरचिटणीस आणि नांदेड महानगरपालिकेचे माजी विरोधी पक्षनेते जीवन घोगरे पाटील यांचे २२ डिसेंबर रोजी सकाळी सिडको परिसरात भररस्त्यात अपहरण करण्यात आले. अपहरणानंतर त्यांना अज्ञात ठिकाणी नेत बेदम मारहाण करण्यात आली. या घटनेत ते गंभीर जखमी झाले आहेत. हा संपूर्ण थरार परिसरातील सीसीटीव्ही कॅमेऱ्यात कैद झाला असून, फुटेज सोशल मीडियावर व्हायरल झाले आहे.
याबाबत मिळालेल्या माहितीनुसार, सकाळी साडेअकरा वाजण्याच्या सुमारास घोगरे पाटील आपल्या टोयोटा इनोव्हा कारमध्ये जात असताना समोरून आलेल्या महिंद्रा स्कॉर्पिओ गाडीने त्यांचा मार्ग अडवला. सीसीटीव्ही फुटेजमध्ये दिसते की, गाडीतून उतरलेल्या काही व्यक्तींनी घोगरे यांना जबरदस्तीने ओढून गाडीत बसवले आणि वाहन वेगाने निघून गेले. अपहरणानंतर त्यांना अज्ञात ठिकाणी नेून जीवघेणी मारहाण करण्यात आली. मारहाण करणाऱ्यांनी “भविष्यातील मंत्री चिखलीकर यांच्याशी वैर घेऊ नकोस” अशी धमकी दिली आणि संतोष देशमुख यांच्यासारखे संपवून टाकू असा इशारा दिल्याचे घोगरे यांनी सांगितले.
घोगरे पाटील यांनी थेट पक्षातील आमदार प्रताप पाटील चिखलीकर आणि माजी आमदार मोहनराव हंबर्डे यांच्यावर हल्ल्याचा कट रचल्याचा गंभीर आरोप केला आहे. त्यांच्या तक्रारीवरून पोलिसांनी चिखलीकर आणि हंबर्डे यांच्यावर भडकावणे आणि हिंसा भडकावण्याचे आरोप ठेवले आहेत. पोलिसांनी सात आरोपींना अटक केली असून, त्यात शुभम दत्ता सुनेवाड, राहुल मारोती दासरवाद, कौस्तुभ रमेश रानवीर, विवेक नरहरी सूर्यवंशी, माधव बालाजी वाघमारे, मोहम्मद अफरोज फकिर आणि देवानंद भोळे यांचा समावेश आहे. यापैकी काही आरोपींची गुन्हेगारी पार्श्वभूमी आहे.
घोगरे पाटील यांना डोक्याला गंभीर दुखापत झाली असून, ते सध्या रुग्णालयात उपचार घेत आहेत. हॉस्पिटलच्या बेडवरून त्यांनी अजित पवार आणि उपमुख्यमंत्री एकनाथ शिंदे यांना आवाहन केले की, नांदेडमधील ‘गुंडाराज’ थांबवावा. या घटनेमुळे पक्षांतर्गत वाद उघड झाला असून, राजकीय वर्तुळात मोठी खळबळ उडाली आहे. घोगरे यांच्या समर्थकांनी मंगळवारी सिडको परिसरात बंद पुकारला आहे.
