बीड : राज्यात महिला आणि मुली खरंच सुरक्षित आहेत का? असा प्रश्न उपस्थित होत आहे. कारण बीडमधून एक धक्कादायक घटना समोर आली आहे. बीडमधील एका गावात विवाहितेवर अत्याचार करण्यात आल्याची संतापजनक घटना समोर आली आहे. ही विवाहिता घरात झोपली होती. पण आरोपीने तिला घरातून उचलून गावाबाहेर नेलं. तिथे तिच्यावर अत्याचार केला. आरोपीचा क्रूरपणा एवढ्यावरच थांबला नाही तर आरोपीने पीडित महिलेला गावच्या चावडीवरील खांब्याला बांधून ठेवलं. या घटनेचा व्हिडाओ सोशल मीडियावर व्हायरल होत आहे.
या घटनेप्रकरणी पोलिसांनी आरोपी वैभव पटेकर याला बेड्या ठोकल्या आहेत. आरोपीला कोर्टाने 17 मार्चपर्यंत पोलीस कोठडी सुनावली आहे. बीडच्या पिंपळनेर पोलीस ठाण्यात या संपूर्ण घटनेप्रकरणी गुन्हा दाखल करण्यात आला आहे. या प्रकरणातील आरोपीला तातडीने अटक करण्यात आली आहे. पोलिसांकडून पीडित महिलेची विचारपूस केली जात आहे. तसेच या प्रकरणात सखोल तपास केला जात आहे.
नेमकं काय घडलं?
संबंधित घटना ही बीड जिल्ह्यात पिंपळनेर पोलीस ठाणे हद्दीतील एका गावात घडली आहे. गरम होत असल्याने रात्रीच्या वेळी महिलेने घराचा दरवाजा उघडा ठेवला होता. याच गोष्टीचा फायदा घेत आरोपी हा पीडित महिलेच्या घरात शिरला. घरात सर्वजण झोपले होते. आरोपीने घरात झोपलेल्या विवाहितेला उचलून नेत गावाबाहेर नेले. आरोपीने हे कृत्य करत असताना पीडितेने ओरडण्याचा प्रयत्न केला. पण आरोपीने तिचं तोंड हाताने घट्ट दाबलं. यानंतर आरोपी गावाबाहेर नदीत पीडितेला घेऊन गेला. तिथे त्याने पीडितेवर अत्याचार केला.
पीडितेने आरोपीला प्रतिकार करण्याचा प्रचंड प्रयत्न केला. पण तिची शक्ती आरोपीसमोर कमी पडली. या घटनेत पीडिता बेशुद्ध झाली. या घटनेनंतर आरोपीने क्रूरपणाच्या सर्व सीमा पार केल्या. त्याने बेशुद्ध झालेल्या पीडितेला गावाच्या चावडीवर नेलं. तिथे त्याने खांब्याला पीडितेला बांधलं आणि तिथून पसार झाला. पहाटे गावाचे नागरीक चावडीवर आले तेव्हा त्यांनी पीडितेची विचारपूस केली. त्यानंतर सर्व प्रकार उघडकीस आला. या घटनेचा व्हिडीओही सोशल मीडियावर व्हायरल होत आहे. तसेच या घटनेमुळे गावासह संपूर्ण जिल्ह्यात खळबळ उडाली.
घटनेची माहिती मिळताच पोलीस घटनास्थळी दाखल झाले. पोलिसांनी तातडीने आरोपीचा शोध घेत त्याला अटक केली. त्यानंतर त्याला कोर्टात हजर केलं. घटनेचं गांभीर्य ओळखून कोर्टाने आरोपीला 17 मार्चपर्यंत पोलीस कोठडी सुनावली. तसेच या घटनेप्रकरणी पिंपळनेर पोलीस आणि ‘पिंक’ पथकाकडून सखोल तपास केला जात आहे.
