परभणी : प्रलंबित वेतनातून 18 हजार रुपयांची मागणी करून ती स्वीकारताना खान लिपीक बुढन खान महेबूब खान पठाण (53) यांना रंगेहाथ पकडले. या प्रकरणी लाचेची मागणी करणाऱ्या मुख्याध्यापिका सिद्दीकी अहेमदी मोहम्मद अब्दुल मजीद (57) व लिपिक अशा दोघांना ताब्यात घेण्यात आले. लाचलुचपत प्रतिबंधक विभागाने बुधवार 19 मार्च रोजी ही कारवाई केली.
या प्रकरणी तक्रारदार यांनी 17 मार्च रोजी पर्यवेक्षक लाचलुचपत प्रतिबंधक विभागाकडे तक्रार दाखल केली होती. यात तक्रारदाराला लोकसेवक बुढन खान पठाण यांनी तुम्हाला एप्रिल ते सप्टेंबर 2024 या सहा महिन्यांचे प्रलंबित वेतन मिळाले आहे. त्या वेतनातून एका महिन्याचे 3000 रुपये असे 6 महिन्याचे एकूण 18000 रुपये मुख्याध्यापिका सिद्दिकी अहेमदी यांनी मागितले आहेत. तक्रारदार यांनी लोकसेविका सिद्दिकी अहेमदी यांची भेट घेतली असता त्यांनी 18000 रुपये उद्या आणून द्या, असे म्हटल्याचे तक्रारीत म्हटले. या तक्रारीची 18 मार्च रोजी पंचासमक्ष पडताळणी करण्यात आली, त्यानंतर बुधवारी (दि. 19) रोजी करण्यात आलेल्या सापळा कारवाई केली. दरम्यान तक्रारदाराने लोकसेविका अहेमदी सिद्दिकी यांना 18000 रुपये आणले आहेत, असे सांगितले. त्यावर सिद्दिकी अहेमदी यांनी पंचासमक्ष लाचेची रक्कम लोकसेवक बुढन खान पठाण यांच्याकडे देण्यास सांगितली. त्यावरून ही रक्कम स्वीकारताना आरोपी लोकसेवक बुढन खान महेबुब खान पठाण यांना लाचेच्या रक्कमेसह ताब्यात घेण्यात आले.
यावेळी आरोपी लोकसेविका सिद्दिकी अहेमदी यांच्या जवळून 9840 रुपये आणि 1 मोबाईल तसेच घराची झडती घेतली असता परभणी येथील निवासस्थानी 9 लाख 50 हजार रूपये मिळाले. तसेच आरोपी लोकसेवक बुढन खान यांच्या जवळून लाचेची रक्कम 18000 आणि 5190 व 1 मोबाईल जप्त केला. आरोपी बुढन खान पठाण यांच्या परभणी येथील घराची घरझडती कार्यवाही सुरू आहे.
