Latur Police : लातूरमध्ये लाचलुचपत प्रतिबंध विभागाने (ACB) मोठी कारवाई करत पोलिस निरीक्षकाला लाच घेताना रंगेहात पकडले. उदगीर ग्रामीण पोलिस ठाण्याचे निरीक्षक राजकुमार पुजारी यांना ४५ हजार रुपयांची लाच स्वीकारताना अटक करण्यात आली असून या घटनेमुळे पोलिस दलात खळबळ उडाली आहे.
मिळालेल्या माहितीनुसार, एका गुन्ह्यात अटक टाळण्यासाठी तब्बल ३ लाख रुपयांची लाच मागण्यात आली होती. ही मागणी पोलिस कर्मचारी राहुल नागरगोजे यांच्या माध्यमातून करण्यात आल्याचे समोर आले आहे. एसीबीने सापळा रचत दोघांनाही लाच घेताना पकडले.
सध्या एसीबीकडून राजकुमार पुजारी यांच्या घराची झाडाझडती सुरू असून दोन्ही आरोपींची चौकशी करण्यात येत आहे. या कारवाईमुळे लातूर पोलिस दलात एकच खळबळ उडाली आहे.
दरम्यान, नाशिकमध्येही एसीबीने अशाच प्रकारची कारवाई करत बांधकाम विभागातील अधिकाऱ्याला ३ लाख रुपयांची लाच घेताना अटक केली आहे. या दोन्ही घटनांमुळे राज्यातील भ्रष्टाचाराविरोधात ACBची कारवाई अधिक तीव्र झाल्याचे दिसून येत आहे.
