नवी मुंबई : नवी मुंबईतील सानपाडा पोलीस स्टेशनमध्ये कार्यरत असलेल्या पोलीस शिपाई स्वप्निल लोहार यांनी उलवे येथील राहत्या घरी गळफास घेऊन आत्महत्या केल्याची धक्कादायक घटना समोर आली आहे. या घटनेमुळे परिसरात खळबळ उडाली असून, उलवे पोलीस स्टेशनमध्ये या प्रकरणाची नोंद करण्यात आली आहे. प्राथमिक तपासात ही आत्महत्या कौटुंबिक वादातून झाल्याचे समोर आले आहे.
मिळालेल्या माहितीनुसार, उलवे येथे राहणारे स्वप्निल लोहार हे सानपाडा पोलीस स्टेशनमध्ये पोलीस शिपाई म्हणून कार्यरत होते. गुरुवार, 11 सप्टेंबर 2025 रोजी घरी एकटे असताना त्यांचे पत्नीसोबत फोनवर बोलणे झाले. या संभाषणादरम्यान दोघांमध्ये तीव्र वाद झाला. या वादानंतर स्वप्निल यांनी टोकाचा निर्णय घेत घरात गळफास लावून आयुष्य संपवले. घटनेची माहिती मिळताच स्थानिक पोलिसांनी घटनास्थळी धाव घेतली आणि तपास सुरू केला.
उलवे पोलीस स्टेशनमध्ये या घटनेची नोंद करण्यात आली असून, आत्महत्येच्या कारणांचा शोध घेण्यासाठी तपास सुरू आहे. प्राथमिक माहितीनुसार, स्वप्निल लोहार यांचे पत्नीसोबत झालेले भांडण हे आत्महत्येचे प्रमुख कारण असल्याचे सांगितले जात आहे. पोलिसांनी या प्रकरणी अधिक माहिती गोळा करण्यासाठी तपासाची चक्रे फिरवली आहेत.
