पुणे: पुणे शहरातील स्वारगेट बस आगारामध्ये काही दिवसांपुर्वी एका 26 वर्षीय तरूणीवर बलात्कार झाल्याची घटना घडली होती. यानंतर राज्यात एकच खळबळ माजली होती. आता या प्रकरणातील आरोपी दत्ता गाडे याच्या वकिलावर हल्ला झाल्याची माहिती समोर येत आहे. साहिल डोंगरे असे हल्ला झालेल्या वकिलाचे नाव आहे. सोमवारी (दि. 17) संध्याकाळी हडपसर येथून साहिल डोंगरे यांचे अपहरण करुन त्यांना बोपदेव घाटात नेण्यात आले.
त्यानंतर डोंगरे यांना मारहाण करून दिवे घाटात सोडून देण्यात दिले. साहिल डोंगरे यांनी जखमी अवस्थेतच हडपसर पोलीस ठाणे गाठत तक्रार दाखल केली. या हल्ल्याचे कारण अद्याप अस्पष्ट आहे. सध्या ॲडव्होकेट डोंगरे यांच्यावर ससून रुग्णालयात उपचार करण्यात येत आहेत. स्वारगेट अत्याचार प्रकरणातील आरोपी दत्ता गोडेचे वकील वाजीद खान यांचे साहिल डोंगरे सहायक वकील आहेत.
दरम्यान काही दिवसांपुर्वी पुण्यातील स्वारगेट आगारामध्ये शिवशाही बसमध्ये एका 26 वर्षीय तरूणीवर बलात्कार झाला होता. 25 फेब्रुवारीच्या पहाटे ही घटना घडली होती. स्वारगेटवरून फलटणला निघालेल्या तरुणीला चुकीच्या शिवशाही बसमध्ये नेऊन आरोपी दत्ता गाडेने अत्याचार केला होता. यामुळे राज्यातील महिलांच्या सुरक्षेचा प्रश्न ऐरणीवर आला. अखेर 28 फेब्रुवारी रोजी पहाटे दत्तात्रय गाडे याच्या मुसक्या आवळण्यात पुणे पोलिसांना यश आले. शिरुर तालुक्यातील गुनाट गावातून गाडेला अटक केली.
