Baramati Bypoll 2026 : महाराष्ट्रातील बारामती आणि राहुरी विधानसभा पोटनिवडणुकांच्या मतमोजणीला आज सकाळपासून सुरुवात झाली असून बारामतीत उपमुख्यमंत्री सुनेत्रा पवार यांनी सुरुवातीपासूनच जोरदार आघाडी घेतली आहे. पहिल्याच फेरीअखेर त्या सुमारे ६,५०० मतांनी आघाडीवर असल्याची माहिती समोर आली असून त्यांचा विजय जवळपास निश्चित मानला जात आहे.
उपमुख्यमंत्री अजित पवार यांच्या अपघाती निधनानंतर बारामती विधानसभा मतदारसंघात ही पोटनिवडणूक होत आहे. या निवडणुकीत सुनेत्रा पवार यांच्यासह एकूण २३ उमेदवार रिंगणात आहेत. सकाळी ८ वाजल्यापासून बारामती एमआयडीसी परिसरातील वखार महामंडळाच्या गोदामात मतमोजणीला सुरुवात झाली.
सुरुवातीला पोस्टल मतांची मोजणी करण्यात आली. त्यातही सुनेत्रा पवार आघाडीवर असल्याचे स्पष्ट झाले. त्यानंतर सकाळी ८.३० वाजता ईव्हीएम मतमोजणीला सुरुवात झाली आणि पहिल्याच फेरीत त्यांनी मोठी आघाडी घेतली.
बारामतीतील ही पोटनिवडणूक बिनविरोध व्हावी, अशी भूमिका महायुतीसोबतच शरद पवार गटानेही घेतली होती. काँग्रेसने सुरुवातीला उमेदवार दिला होता, मात्र चर्चेनंतर अर्ज मागे घेण्यात आला. तरी काही अपक्ष उमेदवार मैदानात कायम आहेत.
सर्व प्रमुख पक्ष, स्थानिक संघटना आणि अनेक बड्या नेत्यांनी सुनेत्रा पवारांना पाठिंबा दर्शवल्याने ही निवडणूक जवळपास एकतर्फी ठरणार असल्याचे चित्र आधीपासूनच स्पष्ट होते. पहिल्या फेरीतील ६,५०० मतांची आघाडी पाहता त्यांचा विक्रमी मताधिक्याने विजय होण्याची शक्यता वर्तवली जात आहे.
बारामतीत अजित पवार यांच्या निधनानंतर भावनिक वातावरण निर्माण झाले असून, या पार्श्वभूमीवर सुनेत्रा पवारांना मतदारांचा मोठा प्रतिसाद मिळत असल्याचे दिसून येत आहे. आता त्यांचा अंतिम विजयाचा आकडा किती असेल, याकडे संपूर्ण राज्याचे लक्ष लागले आहे.
