पुणे : श्री क्षेत्र भीमाशंकर येथे दर्शन व्यवस्थेत मोठा बदल करण्यात आला असून व्हीआयपी दर्शन सेवा बंद करण्याचा निर्णय देवस्थान प्रशासनाने घेतला आहे. यापुढे शासकीय अधिकारी, लोकप्रतिनिधी तसेच इतर कोणत्याही मान्यवर व्यक्तीसाठी स्वतंत्र दर्शन व्यवस्था उपलब्ध राहणार नाही.
भीमाशंकर देवस्थान प्रशासन आणि जिल्हा प्रशासन यांच्यात झालेल्या बैठकीत हा महत्त्वपूर्ण निर्णय घेण्यात आला. दर्शन व्यवस्थेत समानता, पारदर्शकता आणि शिस्त राखण्याच्या उद्देशाने सर्व भाविकांना एकाच नियमांतून दर्शनाची सुविधा देण्यात येणार आहे.
या निर्णयानुसार कोणत्याही व्यक्तीस विशेष सवलत किंवा स्वतंत्र रांग उपलब्ध असणार नाही. त्यामुळे सर्व भाविकांना समान पद्धतीने दर्शन घेता येणार आहे.
दरम्यान, भाविकांचा वाढता प्रतिसाद लक्षात घेता २४ तारखेपर्यंतचे सर्व ऑनलाईन दर्शन स्लॉट पूर्णपणे भरले आहेत. त्यामुळे दर्शनासाठी येणाऱ्या भाविकांनी किमान दोन दिवस आधी ऑनलाईन बुकिंग करूनच मंदिरात यावे, असे आवाहन देवस्थान प्रशासनाने केले आहे.
