पुणे : महाराष्ट्रातील नगरपरिषद आणि नगरपंचायत निवडणुकीच्या निकालांमध्ये पुणे जिल्ह्यात भाजपने जोरदार मुसंडी मारली आहे. सासवड नगरपंचायतीत पहिल्यांदाच भाजपची सत्ता स्थापन झाली असून, काँग्रेसमधून भाजपमध्ये आलेले माजी आमदार संजय जगताप यांच्या आई आनंदी जगताप यांनी नगराध्यक्षपदावर दणदणीत विजय मिळवला. त्यांनी शिंदे गटाच्या शिवसेनेचे सचिन भोंगळे यांच्यावर सुमारे १००० मतांच्या फरकाने मात केली.
सासवडमध्ये भाजपला १३ नगरसेवक निवडून आले, तर शिंदे गटाच्या शिवसेनेला ९ जागा मिळाल्या. ही निवडणूक भाजप आणि शिंदे गटाच्या शिवसेना यांच्यात थेट लढत झाली होती. एकीकडे संजय जगताप यांचे नेतृत्व, तर दुसरीकडे विद्यमान आमदार विजय शिवतारे यांचा प्रभाव असल्याने ही लढत अतिशय प्रतिष्ठेची बनली होती.
भाजपच्या ‘ऑपरेशन लोटस’ला यश:
– काही महिन्यांपूर्वी संजय जगताप यांनी काँग्रेस सोडून भाजपमध्ये प्रवेश केला होता.
– त्यांच्या प्रवेशामुळे सासवडमध्ये भाजपची ताकद वाढली आणि राष्ट्रवादी-काँग्रेसच्या गडात भगदाड पडले.
– संजय जगताप यांच्या नेतृत्वाखाली भाजपने स्थानिक पातळीवर मजबूत संघटन केले, ज्याचा फायदा निकालात दिसला.
राज्यभरात भाजपचे वर्चस्व:
राज्यातील २४६ नगरपरिषदा आणि ४२ नगरपंचायतींच्या निकालांमध्ये भाजप सर्वात मोठा पक्ष ठरला आहे. महायुतीला स्पष्ट आघाडी मिळाली असून, शिंदे गटाची शिवसेना आणि अजित पवारांची राष्ट्रवादी यांना चांगले यश मिळाले. पुणे जिल्ह्यातही भाजपने शिंदे गटाला मागे टाकत आघाडी घेतली आहे.
सासवडमधील हा विजय भाजपसाठी ऐतिहासिक असून, पुरंदर-हवेली भागात पक्षाची पकड आणखी मजबूत झाली आहे. विजय शिवतारे यांच्यासाठी हा मोठा धक्का मानला जातोय. निकालांमुळे स्थानिक राजकारणात नवे समीकरण निर्माण झाले आहे.
