इंदापूर (पुणे): येथील तहसील कार्यालयातील महसूल सहाय्यक म्हणून कार्यरत असलेल्या कावेरी विजय खाडे यांना शेतकऱ्याकडून २५ हजाराची लाच घेतल्याप्रकरणी लाच लुचपत प्रतिबंधक विभागाने ताब्यात घेऊन त्यांच्यावर गुन्हा दाखल केला आहे. याबाबत लाचलुचपत प्रतिबंधक विभागाचे पोलीस निरीक्षक प्रेम वाघमारे यांनी दिलेल्या माहितीनुसार, इंदापूर तालुक्यातील भांडगाव येथील तक्रारदार यांच्या वडिलांची ३९ गुंठे जमीन आहे. त्या जमिनीत जाण्यासाठी रस्ता नव्हता.
त्याबाबत सन २०२० पासून तहसीलदार यांच्याकडे दावा सुरू आहे. याबाबत तहसीलदार इंदापूर यांची सुनावणी होऊन निकाल देणे बाबतची प्रक्रिया बाकी होती. सदर निकालाची कागदपत्रे तक्रारदाराच्या बाजूने तयार करून द्यावे म्हणून कावेरी विजय खाडे (वय ४८ वर्षे, महसूल सहाय्यक वर्ग ३ तहसील कार्यालय इंदापूर, रा. संघवीनगर, भिगवण रोड, बारामती) यांनी ५० हजार रुपयांच्या लाचेची मागणी केली होती. तडजोडीअंती २५ हजार रुपये देण्याचे ठरले. त्याबाबत संबंधित शेतकऱ्याने लाचलुचपत प्रतिबंधक विभागाकडे तक्र तक्रार केली होती.
त्यानुसारू शुक्रवार २८ फेब्रुवारी रोजी सायंकाळी ५ वाजता सापळा रचून संबंधित महसूल सहाय्यक कावेरी खाडे यांना २५ हजाराची लाच स्वीकारताना रंगेहाथ ताब्यात घेण्यात आले. त्यावरून इंदापूर पोलीस स्टेशन येथे गुन्हा नोंद करण्यात आला आहे.
