पुणे : पुरंदर तालुक्यातील निरा येथे ओबीसी नेते लक्ष्मण हाके यांच्या विरोधात मराठा आंदोलकांनी जोरदार घोषणाबाजी केल्याची घटना घडली. लोणंदच्या दिशेने जात असताना चहासाठी थांबलेल्या हाकेंना आंदोलकांनी घेराव घालत “एक मराठा, लाख मराठा” अशा घोषणा दिल्या. यामुळे परिसरात तणाव निर्माण झाला. हाकेंनी प्रसंगावधान राखत रस्त्यावरच आंदोलकांसमोर बैठक मांडली, तर पोलिसांनी तातडीने हस्तक्षेप करत परिस्थिती नियंत्रणात आणली आणि काही आंदोलकांना ताब्यात घेतलं.
लक्ष्मण हाके निरा येथील एका हॉटेलमध्ये थांबले असताना मराठा तरुणांना याची माहिती मिळाली. संतप्त आंदोलकांनी हॉटेलबाहेर जमून हाकेंच्या विरोधात घोषणाबाजी सुरू केली. मराठा आरक्षणाच्या मागणीसाठी मनोज जरांगे पाटील यांच्या नेतृत्वाखाली मुंबईत सुरू असलेल्या आंदोलनाच्या पार्श्वभूमीवर हा प्रकार घडला. हाके यांनी सातत्याने मराठा समाजाला ओबीसी प्रवर्गातून आरक्षण देण्यास विरोध दर्शवला आहे, ज्यामुळे मराठा तरुणांमध्ये संताप आहे. पोलिसांनी वेळीच धाव घेत आंदोलकांना शांत केलं आणि काहींना ताब्यात घेतलं.
आंदोलकांनी हल्ला केल्याचा आरोप फेटाळताना सांगितलं, “आम्ही कोणताही हल्ला केला नाही. आम्ही फक्त हाकेंना जाब विचारण्यासाठी गेलो होतो. मनोज जरांगे पाटील उपोषणाला बसले आहेत, आम्हाला आरक्षणाची गरज आहे. प्रत्येक गरजवंत मराठ्याला आरक्षण हवंय. आम्ही केवळ ‘एक मराठा, लाख मराठा’ अशी घोषणाबाजी केली.” आंदोलकांनी आपली भूमिका शांततामय असल्याचं स्पष्ट केलं.
लक्ष्मण हाके यांनी मराठा समाजाला ओबीसी प्रवर्गातून आरक्षण देण्यास सातत्याने विरोध केला आहे. त्यांनी मनोज जरांगे यांच्या आंदोलनावर टीका करताना महाराष्ट्रात अराजकता निर्माण होण्याची भीती व्यक्त केली आहे. यामुळे मराठा आणि ओबीसी समाजात तणाव वाढताना दिसत आहे. हाकेंनी यापूर्वीही सांगितलं होतं की, जरांगेंच्या मागण्या बेकायदेशीर असून, ओबीसी समाज त्यांच्या आंदोलनाला प्रत्युत्तर म्हणून दहापट मोठं आंदोलन उभारेल.
