Accident News : पुण्यातील मुळशी तालुक्यात चांदे-मूलखेड रस्त्यावर रिक्षा आणि फॉर्च्युनर कारमध्ये भीषण अपघात झाल्याची घटना समोर आली आहे. या अपघातात रिक्षाचालकाचा जागीच मृत्यू झाला असून फॉर्च्युनरमधील तिघे जण जखमी झाले आहेत. जखमींमध्ये ठाकरे सेनेच्या पदाधिकाऱ्याचाही समावेश असल्याची माहिती आहे. या घटनेमुळे परिसरात मोठी खळबळ उडाली आहे.
मिळालेल्या माहितीनुसार, मृत रिक्षाचालकाचे नाव विकास अर्जुन पारखी असून ते स्थानिक रहिवासी होते. चांदे-मूलखेड रस्त्यावर भरधाव वेगाने येणाऱ्या फॉर्च्युनर कारची रिक्षाला जोरदार धडक बसली. धडकेची तीव्रता इतकी होती की रिक्षाचालक गंभीर जखमी होऊन त्यांचा मृत्यू झाला.
या अपघातात फॉर्च्युनरमधील तिघे जणही जखमी झाले असून त्यांच्यावर उपचार सुरू आहेत. जखमींमध्ये ठाकरे सेनेचे पुणे जिल्हाप्रमुख प्रकाश भेगडे यांचाही समावेश असून त्यांच्या डोक्याला गंभीर दुखापत झाली आहे. इतर जखमींची प्रकृती स्थिर असल्याची प्राथमिक माहिती मिळत आहे.
अपघातानंतर स्थानिक नागरिकांनी घटनास्थळी धाव घेऊन जखमींना रुग्णालयात हलवले. दरम्यान, अभिमन्यू अर्जुन पारखी यांच्या फिर्यादीवरून फॉर्च्युनर चालकाविरुद्ध पौड पोलीस ठाण्यात गुन्हा दाखल करण्यात आला आहे.
पोलिसांनी घटनास्थळी पंचनामा करून तपास सुरू केला असून वेग आणि निष्काळजीपणा यामुळे हा अपघात घडल्याचा प्राथमिक अंदाज व्यक्त केला जात आहे. पुढील तपास सुरू आहे.
