Sumit Gadre Case: पुण्यातील औंध जिल्हा रुग्णालयातील डॉक्टरांच्या एका गंभीर चुकीमुळे 30 वर्षीय तरुणाला आपला जीव गमवावा लागला आहे. हृदयविकाराचा झटका (Heart Attack) आला असतानाही डॉक्टरांनी त्याकडे दुर्लक्ष करत केवळ पित्ताचे (Acidity) औषध देऊन घरी पाठवल्याचा खळबळजनक प्रकार समोर आला आहे. रुग्णालयातून घरी पोहोचल्यानंतर अवघ्या 15 मिनिटांतच या तरुणाचा मृत्यू झाला.
नेमका घटनाक्रम काय?
जुनी सांगवी परिसरातील ममतानगरमध्ये राहणारा सुमीत श्रीकांत गद्रे (सोनावणे) याला रविवारी पहाटे 3:40 च्या सुमारास छातीत तीव्र वेदना जाणवू लागल्या. घाबरलेल्या नातेवाईकांनी विलंब न करता त्याला औंध जिल्हा रुग्णालयात नेले. ड्युटीवर असलेल्या डॉक्टरांनी सुमीतची ‘ईसीजी’ (ECG) चाचणी केली आणि रिपोर्ट नॉर्मल असल्याचे सांगत त्याला हृदयविकार नसल्याचे खात्रीने सांगितले. त्यानंतर त्याला पित्त आणि मळमळीची औषधे तसेच एक पेनकिलर इंजेक्शन देऊन घरी पाठवून दिले.
घरी पोहोचताच काळाचा घाला
रुग्णालयातून उपचार घेऊन सुमीत घरी पोहोचला, मात्र त्यानंतर अवघ्या 15 मिनिटांतच तो अचानक जमिनीवर कोसळला. नातेवाईकांनी त्याला पुन्हा धावतपळत रुग्णालयात नेले, परंतु तोपर्यंत उशीर झाला होता. डॉक्टरांनी तपासणी अंती सुमीतला मृत घोषित केले. रुग्णालयात जर वेळीच योग्य निदान झाले असते किंवा त्याला ‘ससून’ सारख्या मोठ्या रुग्णालयात हलवण्याचा सल्ला दिला असता, तर सुमीतचा जीव वाचला असता, असा संताप आरोग्य कार्यकर्त्यांनी व्यक्त केला आहे.
नातेवाईकांचा मृतदेह ताब्यात घेण्यास नकार
या धक्कादायक प्रकारानंतर सुमीतच्या कुटुंबियांनी आक्रमक पवित्रा घेतला. संबंधित डॉक्टरांवर सदोष मनुष्यवधाचा गुन्हा दाखल करावा, या मागणीसाठी त्यांनी मृतदेह ताब्यात घेण्यास नकार दिला. अखेर सांगवी पोलिसांनी मध्यस्थी केली आणि ससून रुग्णालयातील तज्ज्ञांच्या अहवालानंतर दोषींवर कडक कारवाई करण्याचे आश्वासन दिले. त्यानंतर नातेवाईकांनी सुमीतचे पार्थिव ताब्यात घेतले.
