थेऊर (पुणे): थेऊर येथील दत्तनगर-काकडे वस्ती परिसरात एक दुर्दैवी घटना घडली आहे. एका महिलेने आपल्या दोन लहान बाळांना पाण्याच्या टाकीत बुडवून हत्या केल्याची माहिती समोर आली आहे. संबंधित महिलेने त्यानंतर स्वतःही आत्महत्या करण्याचा प्रयत्न केला आहे. या घटनेची माहिती मिळताच लोणी काळभोर पोलिस स्टेशनचे वरिष्ठ पोलीस निरीक्षक राजेंद्र पन्हाळे व त्यांचे सहकारी घटनास्थळी दाखल झाले असून घटनेची माहिती घेत आहेत.
संबंधित महिला आपल्या माहेरी बाळंतपणासाठी आल्याची प्राथमिक माहिती आहे. तिने आपली दोन्हीही जुळी मुले पाण्याच्या टाकीत बुडवली व त्यानंतर स्वतःही त्या टाकीत उडी मारली.ही बाब घरातील मंडळींना समजल्यानंतर त्यांनी त्या महिलेसह दोन्ही बाळांना पाण्यातून बाहेर काढले. तोपर्यंत पोलीस देखील घटनास्थळी पोहोचले. सध्या पुढील कार्यवाही चालू असल्याची माहिती समोर येत आहे. पोलिसांनी दोन्ही बाळांचे मृतदेह शवविच्छेदनासाठी पाठवले आहेत.
दरम्यान जन्मदात्या आईने एवढ्या टोकाचे पाऊल का उचलले? आपल्या पोटच्या दोन बाळांना निर्घृणपणे का मारले? हे अद्यापपर्यंत समजले नाही. लवकरच याबाबत माहिती समोर येईल.
