पुणे : मैत्रीणीसोबत बोलत थांबलेल्या तरुणाला ब्लॅकमेल करून, गुन्हा दाखल करण्याच्या धमकीने ५० हजार रुपये मागणाऱ्या येरवडा पोलिस ठाण्यातील दोघा पोलिसांना सोमवारी (दि. ५) निलंबित करण्यात आले. पोलिस उपायुक्त हिम्मत जाधव यांनी याबाबतचे आदेश जारी केले आहेत.
दयानंद शिवाजी कदम आणि अश्विन ईश्वर देठे अशी दोघांची नावे आहेत. हा प्रकार उजेडात आल्यानंतर पोलिस आयुक्त अमितेश कुमार यांनी या प्रकरणाची गंभीर दखल घेलली. या दोघा पोलिसांचे वर्तन अशोभनिय, बेशिस्त आणि बेजबाबदारपनाचे असून, त्यांच्या कृत्यामुळे पोलिस दलाची प्रतिमा मलीन झाल्याचा ठपका ठेवत त्यांना तडकाफडकी निलंबीत करण्यात आले आहे. याबाबतची चौकशी लोणीकंद पोलिस ठाण्याचे वरिष्ठ पोलिस निरीक्षक सर्जेराव कुंभार यांच्याकडे देण्यात आली आहे.
पोलिस कर्मचारी कदम आणि देठे हे दोघे २४ एप्रिल रोजी येरवडा परिसरात गस्त घालत होते. कॉमर झोन परिसरात तरुण-तरुणी गाडीत बोलत थांबले होते. त्यावेळी दोघे पोलिस तेथे आले. त्यांनी तरुणाला तुम्ही गाडीत बसून अश्लील चाळे करत असल्याचे सांगून गुन्हा दाखल करण्याची धमकी दिली. तसेच, कारवाई टाळण्यासाठी पन्नास हजार रुपयांची मागणी केली. तरुणाने याबाबत थेट येरवडा पोलिस ठाण्यात धाव घेत तक्रार दाखल केली होती.
हा तरुण टिंगरेनगर येथे वास्तव्यास असून तो महाविद्यालयीन शिक्षण घेतो. तो वैद्यकीय उपचारासाठी कॉमर झोन परिसरातील येथील एका डॉक्टरकडे आला होता. काम झाल्यानंतर तो बाहेर पडला. तरुणाला त्याची मैत्रीण भेटली. त्यावेळी सायंकाळचे पाच वाजले होते. तरुण आणि त्याची मैत्रीण दोघे चारचाकी गाडीत बसून गप्पा मारत होते. त्यावेळी कदम आणि देठे यांनी त्यांना धमकावून पन्नास हजार रुपयांची मागणी केली. तरुणाच्या तक्रारीची खातरजमा केल्यानंतर कदम आणि देठे यांना निलंबित करण्यात आले आहे.
