पुणे: वैष्णवी हगवणे आत्महत्या प्रकरणात सहआरोपी असलेल्या नीलेश चव्हाण याचा शस्त्र परवाना शहर पोलिसांनी आधी नाकारला होता; मात्र, त्याने गृहराज्य मंत्रालयातून त्यासाठी परवानगी मिळवली असल्याची धक्कादायक माहिती बुधवारी ( दि. ४) पुढे आली. या प्रक्रियेमध्ये स्थानिक पोलिसांनी चव्हाण याच्या गुन्हेगारी कृत्यांची माहिती दडवली असल्याचे आरोप केले जात आहेत. वैष्णवीचा पती शशांक, दीर सुशील आणि नणंद करिश्माचा मित्र नीलेश चव्हाण यांनी एकाच महिन्यात शस्त्रांचे परवाने मिळवले असल्याची माहिती यापूर्वीच तपासात निष्पन्न झाली आहे. त्याबाबत हगवणे यांचा नातलग असलेल्या जालिंदर सुपेकर या वरिष्ठ पोलीस अधिकाऱ्याने शिफारस केली असल्याचेही आरोप केले जात आहेत. या प्रकरणाशी त्यांचा संबंध असल्याचे लक्षात आल्यावर सुपेकर यांची कारागृह विभागातून राज्य राखीव दलात तडकाफडकी बदली करण्यात आली.
वैष्णवीच्या आत्महत्येनंतर पसार झालेल्या नीलेश चव्हाण याला पिंपरी चिंचवड पोलिसांनी नेपाळच्या सीमावर्ती भागातून गेल्या आठवड्यात अटक केली. सध्या तो पोलिसांच्या कोठडीत आहे. त्याच्याकडे करण्यात आलेल्या तपासातून अनेक धक्कादायक बाबी पुढे आल्या आहेत. चव्हाण याने पुणे शहर पोलिसांकडे शस्त्र परवाना मिळवण्यासाठी अर्ज केला होता. मात्र, त्यासाठी त्याने दिलेले कारण योग्य वाटत नसल्याने पोलिसांनी सुरुवातीला त्याचा परवाना नाकारला. त्यानंतर, चव्हाण याने राजकीय ताकदीचा वापर करून थेट तत्कालीन गृहराज्यमंत्र्याच्या शिफारसीने पुणे पोलिसांकडून शस्त्र परवाना मंजूर करून घेतल्याची माहिती पुढे आली आहे.
चव्हाण याच्याविरुद्ध यापूर्वी वारजे माळवाडी पोलीस ठाण्यात लैंगिक अत्याचाराचा व अन्य गंभीर गुन्ह्यांची नोंद आहे. शहर पोलिसांनी शस्त्र परवाना नाकारल्यानंतर चव्हाण याने गृहराज्य मंत्रालयात अपील केले. शस्त्र परवाना मिळवण्याची प्रक्रिया सुरु असताना गृहराज्यमंत्र्यांच्या सुनावणी दरम्यान शहर पोलिसानी या गुन्ह्याची माहिती का दडवली ? की तसे माहिती असूनही त्याला परवांना मंजूर करण्यात आला ? हे नेमकेपणाने स्पष्ट झाले नसले, तरी मंत्र्यांच्या शिफारसीमुळेच पुणे पोलिसांनी त्याला परवाना मंजूर केल्याची माहिती पोलीस सूत्रांनी दिली.
