रायपूर: छत्तीसगडमधील रायपूरमध्ये रविवारी रात्री उशिरा एक भीषण रस्ता अपघात झाला. रायपूर-बालोदा बाजार रोडवरील सारागावजवळ ट्रक आणि ट्रेलरमध्ये झालेल्या धडकेत नऊ महिला आणि चार मुलांसह तेरा जणांचा मृत्यू झाला. त्याच वेळी, ११ जण जखमी झाले आहेत. जखमींना उपचारासाठी रुग्णालयात पाठवण्यात आले आहे.
कुटुंब छटी कार्यक्रमावरून परतत होते
पोलिसांकडून मिळालेल्या माहितीनुसार, हे सर्व लोक छत्तीसगडमधील चटौद गावातील रहिवासी होते. जवळच्या बनसरिया गावात एका कौटुंबिक छठी कार्यक्रमाला उपस्थित राहून ते परतत होते. त्यानंतर, रात्री ११ वाजताच्या सुमारास, सारागावजवळ त्यांची ट्रक एका भरधाव ट्रेलरला धडकली. ही धडक इतकी भीषण होती की, अनेक लोक जागीच मृत्युमुखी पडले.
#WATCH | Raipur, Chhattisgarh: Raipur SP Lal Ummed Singh said, “… Some people from village Chataud had gone to Bana Banarasi to participate in the Chatthi program. They were returning after the program was over… During this, an accident happened near Raipur-Balodabazar… https://t.co/F7IzlhKam3 pic.twitter.com/Bkj7Q3uuVy
— ANI (@ANI) May 12, 2025
अपघाताची माहिती मिळताच खरोरा पोलिस स्टेशन आणि प्रशासनाचे पथक घटनास्थळी पोहोचले. सर्व जखमींना तात्काळ रायपूर येथील डॉ. भीमराव आंबेडकर रुग्णालयात पाठवण्यात आले. रायपूरचे एसपी लाल उमेद सिंह यांनी सांगितले की, ट्रकमध्ये सुमारे २५ लोक प्रवास करत होते. ट्रक आणि ट्रेलरमध्ये झालेल्या धडकेनंतर रात्री उशिरापर्यंत मदत आणि बचाव कार्य सुरू होते.
घटनेचा तपास सुरू
रायपूरचे जिल्हाधिकारी गौरव सिंह म्हणाले की, जिल्हा प्रशासनाने तातडीने बचाव कार्य सुरू केले आहे आणि जखमींना आवश्यक उपचार दिले जात आहेत. या प्रकरणी पोलिसांनी गुन्हा दाखल केला असून अपघाताचा तपास सुरू आहे. प्राथमिक माहितीवरून असे दिसून येते की, या अपघातामागे जास्त वेग आणि चालकाचा निष्काळजीपणा हे कारण असू शकतो.
जखमींपैकी अनेकांची प्रकृती चिंताजनक असल्याचे सांगण्यात येत आहे. डॉक्टरांचे एक पथक त्याच्यावर सतत लक्ष ठेवून आहे. स्थानिक प्रशासन मृतांच्या कुटुंबियांना मदत करेल असे सांगण्यात आले आहे.
