Prateek Yadav Death: समाजवादी पक्षाचे अध्यक्ष अखिलेश यादव यांचे बंधू प्रतीक यादव यांच्या मृत्यूचे गूढ आता उलगडू लागले आहे. त्यांचा प्राथमिक शवविच्छेदन अहवाल (Post-mortem Report) समोर आला असून, डॉक्टरांनी त्यांचा मृत्यू नैसर्गिक असल्याचे नमूद केले आहे. बुधवारी पहाटे ५:५५ च्या सुमारास त्यांना सिव्हिल रुग्णालयात आणले गेले होते, मात्र डॉक्टरांनी त्यांना तपासून ‘ब्रॉट डेड’ (Brought Dead) घोषित केले.
अंतर्गत अवयवांचे नमुने पुढील तपासासाठी जतन
शवविच्छेदन अहवालानुसार, प्रतीक यादव यांना जेव्हा रुग्णालयात आणले, तेव्हा त्यांच्या नाडीचे ठोके पूर्णपणे थांबले होते. त्यांच्या हाताची नखे आणि शरीराच्या काही भागांचा रंग निळा पडलेला आढळला होता. मृत्यूचे नेमके कारण शोधण्यासाठी डॉक्टरांनी त्यांचे हृदय आणि शरीरातील अंतर्गत अवयवांचे नमुने (Viscera) जतन केले असून ते पुढील न्यायवैद्यक तपासणीसाठी पाठवण्यात येणार आहेत. विशेष म्हणजे, किंग जॉर्ज मेडिकल युनिव्हर्सिटी (KGMU) येथील ४ डॉक्टरांच्या पथकाने या शवविच्छेदनाचे संपूर्ण व्हिडिओ चित्रीकरण केले आहे.
व्यावसायिक भागीदाराचा मोठा खुलासा; स्वयंपाकघरातच कोसळले
प्रतीक यादव यांचे व्यावसायिक भागीदार सर्वेश पांडे यांनी दिलेल्या माहितीनुसार, मध्यरात्रीच्या सुमारास प्रतीक यांची प्रकृती अचानक बिघडली होती. त्यांनी रुग्णालयात जाऊन प्राथमिक तपासणीही केली होती, परंतु त्यानंतर ते घरी परतले. दुसऱ्या दिवशी सकाळी ते आपल्या राहत्या घरी स्वयंपाकघरात अचानक बेशुद्ध होऊन कोसळले. त्यांना तातडीने रुग्णालयात हलवण्यात आले, मात्र तोपर्यंत त्यांची प्राणज्योत मालवली होती. त्यांच्या शरीरावर कोणत्याही जखमांच्या खुणा आढळल्या नाहीत, मात्र त्यांचे वजन वाढलेले होते, असे डॉक्टरांनी नमूद केले आहे.
नैराश्य आणि फुफ्फुसाचा विकार; अखिलेश यादव यांचे सूचक विधान
प्रतीक यादव हे गेल्या काही काळापासून नैराश्याशी (डिप्रेशन) झुंज देत होते आणि त्यांच्यावर मेदांता रुग्णालयात उपचार सुरू होते. यासोबतच त्यांना फुफ्फुसाचा गंभीर आजारही जडला होता. आपल्या भावाच्या निधनावर प्रतिक्रिया देताना अखिलेश यादव यांनी व्यवसायातील नुकसानीमुळे येणाऱ्या मानसिक तणावाचा उल्लेख केला. “व्यवसायातील नुकसानीमुळे अनेकदा ताण निर्माण होतो, याप्रकरणी कौटुंबिक निर्णयानुसार कायदेशीर कारवाईचा विचार केला जाऊ शकतो,” असे सूचक विधान त्यांनी केले. दरम्यान, त्यांच्या पत्नी अपर्णा यादव लखनौत पोहोचल्या असून अद्याप कुटुंबाकडून कोणतेही अधिकृत पत्रक जारी करण्यात आलेले नाही.
