नवी दिल्ली: आम आदमी पक्षाच्या नेत्यांच्या अडचणी दिवसेंदिवस वाढत आहेत. ‘आप’ सरकारच्या काळात झालेल्या तीन वेगवेगळ्या घोटाळ्यांमध्ये सक्तवसुली संचालनालयाने (ईडी) मनी लॉन्ड्रिंगअंतर्गत गुन्हे दाखल केले आहेत. रुग्णालय बांधकाम, सीसीटीव्ही आणि शेल्टर होम घोटाळ्यात ईसीआयआरची नोंद करण्यात आली आहे. अशा परिस्थितीत लवकरच ‘आप’च्या बड्या नेत्यांना चौकशीसाठी समन्स पाठवले जाऊ शकते. मीडिया रिपोर्ट्सनुसार, आरोग्यमंत्री सौरभ भारद्वाज आणि सत्येंद्र जैन सर्वात जास्त अडचणीत येऊ शकतात.
सक्तवसुली संचालनालयाने (ईडी) रुग्णालय बांधकाम घोटाळा (५,५९० कोटी) घोटाळ्याचा गुन्हा दाखल केला आहे. या प्रकरणात माजी आरोग्यमंत्री सौरभ भारद्वाज आणि सत्येंद्र जैन यांच्या भूमिकेवर प्रश्नचिन्ह आहे. दिल्ली सरकारने 2018-19 मध्ये 24 रुग्णालय प्रकल्पांना मंजुरी दिली होती. आयसीयू रुग्णालय ६ महिन्यांत बांधायचे होते, मात्र ३ वर्षांनंतरही हे काम अपूर्ण होते. या रुग्णालयांच्या उभारणीसाठी ८०० कोटी रुपये खर्च करण्यात आले, मात्र केवळ ५० टक्केच काम झाले. एलएनजेपी रुग्णालयाचा खर्च ४८८ कोटींवरून ११३५ कोटींवर गेला. अनेक ठिकाणी मंजुरीशिवाय बांधकामे, कंत्राटदारांची भूमिका संशयास्पद एचआयएमएस यंत्रणा २०१६ पासून प्रलंबित असून, जाणीवपूर्वक टाळाटाळ केल्याचा आरोपही होत आहे.
सीसीटीव्ही घोटाळा
2019 मध्ये दिल्लीच्या 70 विधानसभा मतदारसंघात 1.4 लाख सीसीटीव्ही कॅमेरे बसवण्याचा प्रकल्प सुरू करण्यात आला होता. हे कंत्राट सरकारी कंपनी बीईएलला देण्यात आले होते. हे काम वेळेत पूर्ण न झाल्याने बीईएलला १७ कोटी रुपयांचा दंड ठोठावण्यात आला. त्यानंतर कोणतेही ठोस कारण न देता दंड माफ करण्यात आला. त्या बदल्यात सत्येंद्र जैन यांना कंत्राटदारांमार्फत सात कोटी रुपयांची लाच दिल्याचा आरोप आहे.
डीयूएसआयबी घोटाळा
डीयूएसआयबीशी (दिल्ली अर्बन शेल्टर बोर्ड) संबंधित अनेक घोटाळे समोर आले आहेत. बनावट एफडीआरच्या माध्यमातून २०७ कोटी रुपयांचा अपहार झाल्याची माहिती समोर आली आहे. पटेल नगरमध्ये १५ लाख रुपयांची रस्ता दुरुस्ती दाखवून फसवणूक करण्यात आली. टाळेबंदीच्या काळात केलेल्या कामाबाबत खोटी कागदपत्रेही तयार करण्यात आली. २५० कोटींच्या शेल्टर होम घोटाळ्यात बोगस कर्मचाऱ्यांच्या नावाने पगार दाखवण्यात आला.
सीबीआय आणि एसीबी या प्रकरणांचा तपास करत आहेत. आता त्या एफआयआरच्या आधारे ईडीनेही मनी लॉन्ड्रिंगचा तपास सुरू केला आहे. सूत्रांनी दिलेल्या माहितीनुसार, आम आदमी पक्षाच्या अनेक बड्या नेत्यांना लवकरच चौकशीसाठी बोलावले जाऊ शकते.
