न्यूयॉर्क : अमेरिकेचे राष्ट्राध्यक्ष डोनाल्ड ट्रम्प यांच्या दुसऱ्या कार्यकाळात टॅरिफ धोरणे अधिक आक्रमक झाली आहेत. गेल्या आठवड्यात औषध आयातीवर १०० टक्के टॅरिफ जाहीर केल्यानंतर आता ट्रम्प यांनी विदेशी निर्मिती चित्रपटांवरही १०० टक्के टॅरिफ लावण्याचा निर्णय घेतला आहे. ट्रम्प यांच्या ट्रुथ सोशल पोस्टमध्ये म्हटले आहे की, इतर देशांकडून अमेरिकेचा सिनेमा उद्योग “लहान मुलाच्या हातातील कॅंडी चोरल्यासारखा” हिरावला गेला आहे.
कॅलिफोर्नियाच्या “कमकुवत” गव्हर्नर गाविन न्यूसम यांच्यावरही त्यांनी टीका केली आहे. या धोरणामुळे हॉलिवूडला मोठा धक्का बसू शकतो, तर भारतावर रशियन तेल खरेदीमुळे ५० टक्के टॅरिफमुळे आर्थिक नुकसान होण्याची शक्यता आहे. ट्रम्प म्हणाले, “अमेरिकेला पुन्हा महान बनवूया हा दीर्घकाळ चाललेला प्रश्न सोडवण्यासाठी मी तात्काळ कारवाई करतोय.”
हॉलिवूडचा ‘मृत्यू’ थांबवण्याचा ट्रम्पांचा दावा
ट्रम्प यांनी २९ सप्टेंबरला ट्रुथ सोशलवर पोस्ट करून सांगितले की, “अमेरिकेचा सिनेमा उद्योग इतर देशांच्या प्रोत्साहनांमुळे ‘वेगाने मरत आहे’. हे राष्ट्रीय सुरक्षेचा धोका आहे आणि प्रचाराचा साधनही!” त्यानुसार, विदेशात निर्मिती होणाऱ्या सर्व चित्रपटांवर १०० टक्के टॅरिफ लावला जाईल. हे टॅरिफ उत्पादन खर्च किंवा बॉक्स ऑफिस कमाईवर लागू होऊ शकतात, पण तपशील अद्याप अस्पष्ट आहेत. हे धोरण मे २०२५ मध्ये प्रथम जाहीर झाले होते, जेव्हा ट्रम्प यांनी वाणिज्य विभाग आणि व्यापार प्रतिनिधींना तात्काळ अंमलबजावणीचे आदेश दिले होते.
हॉलिवूडला याचा मोठा फटका बसू शकतो, कारण अनेक चित्रपट विदेशी लोकेशन्सवर चित्रित होतात. नेटफ्लिक्स, डिस्नेप्रमाणे कंपन्यांच्या शेअर्समध्ये घसरण दिसली, तर म्युझन पिक्चर असोसिएशनने अद्याप प्रतिक्रिया दिलेली नाही. ट्रम्प यांनी जानेवारीत जॉन वॉइट, सिल्व्हेस्टर स्टॅलोन आणि मेल गिब्सन यांना ‘हॉलिवूड अॅम्बेसेडर’ नेमले होते, पण त्यांचे प्रयत्न अपुरे ठरले. ऑस्ट्रेलिया आणि न्यूझीलंडप्रमाणे देशांनी आपल्या चित्रपट उद्योगाला आधार देण्याची घोषणा केली आहे.
औषध आयातीवर १०० टक्के टॅरिफ
२५ सप्टेंबरला ट्रम्प यांनी जाहीर केले की, १ ऑक्टोबरपासून ब्रँडेड किंवा पेटंटेड औषधांवर १०० टक्के टॅरिफ लागू होईल, जोपर्यंत कंपन्या अमेरिकेत उत्पादन प्रकल्प उभारत नाहीत. अमेरिकेत निर्माण सुरू असलेल्या प्रकल्पांना सूट मिळेल, ज्यात जमीन खोदकाम किंवा बांधकाम सुरू झालेले समाविष्ट आहेत. ट्रम्प म्हणाले, “विदेशी औषधे अमेरिकेच्या सुरक्षेला धोका आहेत. हे उत्पादन अमेरिकेत हलवून खर्च कमी करूया.” जॉन्सन अँड जॉन्सन, एलाय लिलीप्रमाण्या कंपन्यांनी अमेरिकेत गुंतवणूक वाढवली आहे, पण भारतासारख्या देशांतून येणाऱ्या जेनेरिक औषधांना फारसा फटका बसणार नाही.
भारतावर ५० टक्के टॅरिफ: रशियन तेल खरेदीला शिक्षा, व्यापारी संबंध ताणले
ट्रम्प यांनी ऑगस्टमध्ये भारतावर २५ टक्के टॅरिफ लावला, जो रशियन तेल खरेदीमुळे दुप्पट होऊन ५० टक्के झाला. हे कपडे, दागिने, फर्निचर, रसायने यांसारख्या वस्तूंवर लागू आहे. ट्रम्प म्हणाले, “भारत रशियाकडून तेल आणि शस्त्रास्त्रे घेतो, ज्यामुळे अमेरिकेचा व्यापार डावलाल जातो.” भारताने हे “अन्यायकारक” म्हटले असून, पंतप्रधान मोदी यांनी ‘मेड इन इंडिया’ला प्रोत्साहन दिले आहे. यामुळे भारताच्या निर्यातीत ७० टक्के घट होऊ शकते, जीडीपीला १% धक्का बसू शकतो.
