US Iran War : डोनाल्ड ट्रम्प यांनी इराणविरोधात पुन्हा आक्रमक भूमिका घेत सागरी नाकेबंदीचा इशारा दिला आहे. इस्लामाबादमधील अमेरिका-इराण चर्चेची फेरी निष्फळ ठरल्यानंतर हा निर्णय पुढे आला आहे. प्रस्तावित नाकेबंदीअंतर्गत इराणच्या सर्व बंदरांवर ये-जा करणाऱ्या जहाजांवर बंदी घालण्याची योजना आहे. केवळ इराणी जहाजेच नव्हे, तर कोणत्याही देशाची जहाजे इराणी बंदरात गेल्यास किंवा तिथून बाहेर पडल्यास त्यांच्यावरही कारवाई होऊ शकते.
या घडामोडींमुळे जागतिक इंधन पुरवठा साखळीवर मोठा परिणाम होण्याची भीती व्यक्त होत आहे. आखाती प्रदेशातील तणाव वाढल्याने जागतिक अर्थव्यवस्थेलाही धक्का बसण्याची शक्यता आहे. दरम्यान, पूर्ण युद्ध टाळत इराणवर दबाव वाढवण्यासाठी मर्यादित लष्करी कारवाईचे पर्यायही अमेरिका तपासत असल्याचे संकेत मिळत आहेत.
यावर इराणनेही कडक प्रतिक्रिया दिली आहे. शहरम इराणी यांनी अमेरिकेची नाकेबंदीची धमकी ‘हास्यास्पद’ असल्याचे सांगत ती फेटाळून लावली. इराणचे नौदल कोणत्याही आक्रमणाला ठाम प्रत्युत्तर देण्यास तयार असल्याचा इशाराही त्यांनी दिला.
दरम्यान, या तणावाचा थेट परिणाम जागतिक बाजारपेठेत दिसून आला आहे. कच्च्या तेलाच्या किंमतीत 7 ते 8 टक्क्यांची वाढ झाली असून अमेरिकन क्रूड ऑईलचा दर प्रति बॅरल 104 डॉलर्सच्या पुढे गेला आहे, तर ब्रेंट क्रूड 102 डॉलर्सवर पोहोचले आहे. या वाढत्या दरांचा परिणाम भारतासारख्या तेल आयात करणाऱ्या देशांवर होण्याची शक्यता व्यक्त केली जात आहे.
