नवी दिल्ली: दिल्लीत आम आदमी पक्षाला (आप) मोठा धक्का बसला आहे. पक्षाच्या १५ नगरसेवकांनी राजीनामा दिला आहे. माजी सभागृह नेते मुकेश गोयल यांनी एक नवीन पक्ष स्थापन करण्याचा दावा केला आहे, ज्याला त्यांनी इंद्रप्रस्थ विकास पार्टी असे नाव दिले आहे. त्यांनी दावा केला आहे की, १३ नगरसेवक त्यांच्यासोबत सामील झाले आहेत. त्यांनी म्हटले आहे की, काँग्रेस आणि भाजपचे नगरसेवकही आमच्यात सामील होऊ शकतात.
मुकेश गोयल म्हणाले, ‘आप’ पूर्ण बहुमताने सत्तेत आली होती, पण पक्ष फक्त आदेश देत असे. कोणाचेही ऐकले गेले नाही. फक्त विरोधकांना दोष देण्यात आला. मी १९९७ पासून नगरसेवक आह. पण मी कधीही असे काही पाहिले नाही.
दिल्लीतील महापौरपदाची निवडणूक न लढवण्याची चर्चा होती
२५ एप्रिल रोजी झालेल्या निवडणुकीच्या काही दिवस आधी, आम आदमी पक्षाने (आप) दिल्लीतील महापौरपदाची निवडणूक लढवणार नसल्याची घोषणा केली होती. पक्षाने म्हटले होते की, सध्या दिल्ली महानगरपालिकेत (एमसीडी) त्यांच्याकडे पुरेसे संख्याबळ नाही. भारतीय जनता पक्ष (भाजप) बहुमतात आहे.
आम आदमी पक्षाचे दिल्ली अध्यक्ष सौरभ भारद्वाज यांनी सांगितले की, आम्ही यावेळी महापौरपदाच्या निवडणुकीत आम आदमी पक्षाचा उमेदवार उभा करणार नाही, असा निर्णय घेतला आहे. भाजपने स्वतःचा महापौर निवडावा, भाजपने स्वतःची स्थायी समिती स्थापन करावी आणि कोणत्याही सबबीशिवाय दिल्लीवर राज्य करावे. ते म्हणाले की, दिल्लीत आता ट्रिपल इंजिन सरकार आहे आणि भाजपने राष्ट्रीय राजधानीतील लोकांसाठी ते काय करू शकतात, हे दाखवून द्यावे. एमसीडी निवडणुकीत भाजपचे राजा इक्बाल सिंग दिल्लीचे नवे महापौर म्हणून निवडून आले.
