पिंपरी : भारतीय जनता पार्टीच्या पिंपरी-चिंचवड शहराध्यक्षपदी माजी नगरसेवक शत्रुघ्न काटे यांची निवड करण्यात आली आहे. प्रदेश निवडणूक अधिकारी तथा भाजपाचे आमदार चैनसुख संचेती यांनी पत्राद्वारे याबाबतची घोषणा बुधवारी (ता. 13) केली. या निवडीमुळे शहर भाजपमधील बरीचशी नाराजी कमी होण्याची शक्यता व्यक्त केली जात आहे.
माजी नगरसेवक असलेले शत्रुघ्न काटे हे आपल्या विद्यार्थीदशेपासून विद्यार्थी चळवळीत आहेत. शिवाय मागील वीस वर्षांपासून विविध समाजसेवी संस्थांच्या माध्यमातून समाजकारणात सक्रिय आहेत. सामाजिक काम, नम्र स्वभाव व सुसंस्कृत उच्च शिक्षित चेहरा यामुळे साधारण तीन टर्म पिंपळे सौदागर सारख्या उच्चभ्रू भागातून भरघोस मतांनी निवडून येणारे ते नगरसेवक आहेत. त्यांनी २०१४ मध्ये भाजप पक्षात प्रवेश केला आणि गेल्या दहा वर्षांपासून ते पक्ष विस्ताराकरिता संघटनेचे काम उत्तमरित्या करत आहेत.
दरम्यान मागील दहा वर्षात त्यांना भाजपा पक्षाकडून कोणतेही महत्वाचे पद दिले नाही .त्यामुळे काटे यांनी नाराजी व्यक्त करत थेट जगताप कुटुबिंयाविरोधात आवाज उठविला होता. भाजपमधील पक्षांतर्गत गटबाजी वाढू नये म्हणून काटे यांना शहराध्यक्षपद देण्यात आल्याची चर्चा आहे.
