मुंबई: महाराष्ट्र विधानसभेला लवकरच विरोधी पक्षनेता मिळण्याची शक्यता निर्माण झाली आहे. विधानसभेत विरोधी पक्ष नेता निवडीसाठी एका विशिष्ट संख्याबळाची गरज नाही. तसेच विरोधी पक्षनेता निवडीसंदर्भात महाराष्ट्र विधानसभेच्या नियमात कोणतीही विशिष्ट तरतूद नाही, अशी माहिती विधीमंडळाकडून ठाकरे गटाला पत्राद्वारे देण्यात आली आहे. त्यानंतर ठाकरे गटासाठी विरोधी पक्षनेते पदाचा मार्ग मोकळा झाल्याची चर्चा सुरु आहे. विरोधी पक्षनेता निवडीसंदर्भात कायद्यातील तरतुदींची माहिती देण्यात यावी, यासाठी 25 नोव्हेंबर 2024 रोजी ठाकरे गटाने विधिमंडळाला पत्र लिहले होते.
आता या पत्राला विधिमंडळाकडून उत्तर देण्यात आले आहे. आमदार आदित्य ठाकरे, भास्कर जाधव यांनी हे पत्र दिले होते. भास्कर जाधव यांना विधिमंडळाने पत्राद्वारे उत्तर दिले आहे. विरोधी पक्षनेता निवडीसंदर्भात महाराष्ट्र विधानसभेच्या नियमांमध्ये कोणतीही विशिष्ट तरतूद नसल्याचे म्हटलेआहे. प्रचलित संसदीय प्रथा आणि परंपरा या गोष्टींचा विचार करून विधानसभा अध्यक्ष निर्णय घेत असतात, अशी माहिती विधिमंडळाकडून देण्यात आली आहे.
त्यामुळे राज्याच्या विरोधी पक्षनेते पदासाठी 10 टक्के विधानसभा सदस्य संख्या असावी लागते, या चर्चेला आता पूर्णविराम मिळाला आहे. विधिमंडळाकडून मिळालेल्या उत्तरानंतर शिवसेना-ठाकरे गट लवकरच विरोधी पक्षनेते पदासाठीचा अर्ज दाखल करणार असल्याची माहिती मिळत आहे. आजपासून (दि. ३) अर्थसंकल्पीय अधिवेशन सुरु होत आहे. शिवसेना ठाकरे गट आजच विरोधी पक्षनेतेपदासाठी अर्ज दाखल करू शकतो.
सध्या शिवसेना ठाकरे गट महाविकास आघाडीचा एक महत्वाचा भाग आहे. त्यामध्ये सर्वाधिक 20 आमदार ठाकरे गटाचे आहेत. काँग्रेसचे 16 आणि शरद पवार यांच्या गटाचे 10 आमदार आहेत. विधानसभेत महाविकास आघाडीचे एकूण मिळून संख्याबळ 46 आहे. यात शिवसेना ठाकरे गटाची संख्या जास्त असल्याने विधानसभा अध्यक्षांनी मान्य केल्यास त्यांना विरोधी पक्षनेतेपद मिळू शकते.
