पुणे: राज्य महिला आयोगाच्या अध्यक्षा आणि राष्ट्रवादी काँग्रेस (अजित पवार गट) नेत्या रुपाली चाकणकर यांच्या वादग्रस्त वक्तव्यावरून निर्माण झालेल्या वादाला आता तीव्र स्वरूप आले आहे. फलटण येथील महिला डॉक्टर आत्महत्येच्या प्रकरणात केलेल्या त्यांच्या वक्तव्यामुळे महिला वर्गाचा अवमान झाल्याचा आरोप होत असून, चाकणकर यांच्या राजीनाम्याची मागणी जोर धरू लागली आहे. या पार्श्वभूमीवर राष्ट्रवादीच्या बंडखोर गटासह शिवसेना (ठाकरे गट) आणि राष्ट्रवादी नेत्या रुपाली पाटील ठोंबरे यांच्या नेतृत्वाखाली पुण्यात संतप्त आंदोलन करण्यात आले. गुडलक चौक आणि धायरी येथील रुपाली चाकणकर यांच्या कार्यालयाबाहेर आंदोलनकर्त्यांनी घोषणाबाजी करत तीव्र निषेध नोंदवला.
चुकीला माफी नाही, अध्यक्षांनी राजीनामा द्यावा, अशी मागणी करत आंदोलकांनी हातात फलक आणि बॅनर घेऊन निदर्शने केली. यावेळी “महिला आयोगाचे काम मेकअप नाही”, “महिला आयोग का पुरुष आयोग?” अशा आशयाचे व्यंगात्मक फलकही लावण्यात आले. आंदोलनादरम्यान संतप्त कार्यकर्त्यांनी रुपाली चाकणकर यांच्या छायाचित्रांना जोडे मारले तसेच काही ठिकाणी त्यांचे पोस्टर आणि फ्लेक्स जाळून निषेध व्यक्त केला.
रुपाली पाटील ठोंबरे यांच्या नेतृत्वाखालील आंदोलनात मोठ्या संख्येने महिला सहभागी झाल्या होत्या. तर ठाकरे गटाच्या महिला आघाडीच्या रेखा कोंडे यांनी धायरी येथे निदर्शने आयोजित केली.वरुपाली चाकणकर यांनी फलटण प्रकरणात आत्महत्या केलेल्या महिला डॉक्टरच्या चारित्र्यावर प्रश्न उपस्थित केले आणि तिलाच जबाबदार ठरवले, असा आंदोलकांचा आरोप आहे. त्यामुळे महिला आयोगाचे प्रतिष्ठान आणि विश्वसनीयता दोन्ही धोक्यात आल्याचे मत त्यांनी मांडले.
दरम्यान, उपमुख्यमंत्री अजित पवार यांनीही या वक्तव्यापासून स्वतःला दूर ठेवत ,’महिला आयोगाच्या अध्यक्षा यांनी प्रथम पीडित कुटुंबाची भेट घ्यायला हवी होती,’ असे स्पष्ट म्हटले. त्यांनी हेही नमूद केले की, आयोगाचे मत म्हणजे पक्षाचे मत नाही.
या सर्व घडामोडींवर रुपाली चाकणकर यांनी अद्याप थेट प्रतिक्रिया दिलेली नाही. येत्या काही दिवसांत आपली भूमिका स्पष्ट करणार असल्याचे त्यांनी सांगितले आहे. मात्र, त्यांच्या राजीनाम्याची मागणी दिवसेंदिवस वाढत असल्याने या वादाचे राजकीय पडसाद आगामी काळात अधिक तीव्र होण्याची शक्यता आहे.
