Zilla Parishad Election: राज्यात स्थानिक स्वराज्य संस्थांच्या निवडणुकांनी चांगलीच जोर धरला आहे. नगरपरिषद आणि नगरपंचायतींसाठी उमेदवारी अर्ज दाखल झाल्यानंतर आता प्रचार मोहीम रंगणार असली, तरी सगळ्यांची उत्सुकता जिल्हा परिषद (ZP) आणि पंचायत समिती निवडणुकांच्या तारखांकडेच खिळून आहे. आतापर्यंत अधिकारी पदे रिक्त असल्याने प्रक्रिया ठप्प होती, पण आता या निवडणुका जाहीर होण्याचा मार्ग सुकर झाला आहे.
रिक्त पदांमुळे विलंब
उपजिल्हाधिकारी (SDO) स्तरावर निवडणूक निर्णय अधिकारी (ERO) म्हणून काम करणारी अनेक पदे रिक्त असल्याने ZP-पंचायत समिती निवडणुकांचा दुसरा टप्पा अडकला होता. मात्र महसूल विभागाने ७ नोव्हेंबरला मोठा निर्णय घेत ११२ तहसीलदारांना उपजिल्हाधिकारी म्हणून पदोन्नती दिली. हे अधिकारी पुढील आठ ते दहा दिवसांत नवीन पदस्थापनेवर रुजू होणार असून त्यांचे कार्यभार स्वीकारण्याचे अहवाल विभागीय आयुक्तांकडे जमा केले जात आहेत. ही प्रक्रिया पूर्ण होताच जिल्हा परिषद निवडणुकांच्या पुढील टप्प्याचा कार्यक्रम नोव्हेंबर अखेरीस किंवा डिसेंबरच्या पहिल्या आठवड्यात जाहीर होण्याची शक्यता आहे.
हेही वाचा – पुण्यात अजित पवार गटाला मोठा धक्का; स्थानिक नेतृत्वाला कंटाळून बड्या नेत्याचा राजीनामा
राज्य निवडणूक आयोगाने रिक्त पदांमुळे निवडणूक प्रक्रिया अडखळत असल्याचे सरकारच्या निदर्शनास आणून दिले होते. विशेषतः उपजिल्हाधिकारी पदे भरण्याची आवश्यकता त्यांनी अधोरेखित केली होती. तथापी, सरकारने तातडीने कारवाई करत पदोन्नतीची ऑर्डर काढली. यामुळे निवडणूक प्रक्रिया पुन्हा गतीत आली असून आता केवळ अधिकाऱ्यांच्या रुजूची औपचारिकता बाकी आहे.
नगरपरिषद–नगरपंचायतींच्या निकालानंतर मोठा कार्यक्रम
दरम्यान, ३ डिसेंबर रोजी नगरपरिषद व नगरपंचायतींचे निकाल लागू शकतील. निकाल जाहीर झाल्यानंतर लगेचच राज्यातील ३२ जिल्हा परिषद आणि ३३१ पंचायत समित्या यांच्या निवडणुकीचा कार्यक्रम जाहीर करण्याची तयारी आयोगाकडून सुरू आहे. सूत्रांनी दिलेल्या माहितीनुसार, ५ डिसेंबरनंतर निवडणुकांचे वेळापत्रक जाहीर होण्याची दाट शक्यता आहे.
