Advay Hire Join BJP: स्थानिक स्वराज्य संस्थांच्या निवडणुकांची चाहूल लागताच राज्यभरात पक्षांतराचा वेग वाढला आहे. विशेषतः सत्ताधारी भाजपकडे विविध पक्षांमधून होणारे आगमन लक्षवेधी ठरत आहे. याच पार्श्वभूमीवर छत्रपती संभाजीनगर आणि नाशिक जिल्ह्यात शिवसेना ठाकरे गटाला मोठा फटका बसला आहे छत्रपती संभाजीनगरमधील राजकीय समीकरणे बदलवू शकणारे नेते राजू शिंदे, तर नाशिकमधील महत्त्वाचे युवा नेते अद्वय हिरे दोघांनीही आज औपचारिकरित्या भाजपमध्ये प्रवेश केला. त्याचबरोबर शिंदे गटाचे कन्नड ग्रामीण जिल्हाध्यक्ष भरत राजपूत यांनीही भगवा हातात घेतला.
राजू शिंदे आता भाजपमध्ये
2024 च्या विधानसभा निवडणुकीत शिंदे गटाचे मंत्री संजय शिरसाट यांना तगडे आव्हान देणारे राजू शिंदे यांनी आज पुन्हा एकदा “घरवापसी” केली. प्रवेशानंतर ते म्हणाले, मी भाजप कधीच सोडला नव्हता, फक्त तांत्रिक कारणाने काही काळ दूर गेलो होतो. छत्रपती संभाजीनगरमध्ये भाजपला एकहाती ताकद मिळणारच. अतुल सावे यांच्या नेतृत्वाखाली आम्ही जिल्ह्यात 100 टक्के भाजप करणार आहोत. त्यांच्या प्रवेशामुळे 2029 च्या रणनीतीची भाजपने आत्ताच सुरुवात केल्याची चर्चा राजकीय वर्तुळात रंगू लागली आहे.
हेही वाचा – Amit Thackeray : अनावरण केल्यानंतर २४ तासांतच पुन्हा झाकला शिवरायांचा पुतळा; अमित ठाकरे संतापले
अद्वय हिरेंचा भाजपमध्ये प्रवेश
नाशिक जिल्ह्याचे युवा नेतृत्व असलेले अद्वय हिरे यांनीदेखील आज भाजपमध्ये प्रवेश करताच नाशिक–मालेगावमधील समीकरणे बदलण्याची चिन्हे दिसू लागली आहेत. हिरेंनी आपल्या भाषणात स्पष्ट संदेश दिला की, मालेगाव आणि नांदगावात महापौर पदावर भाजपच बसणार, आम्ही शंभर टक्के तयारीत आहोत. गिरीश महाजन यांनी दिलेल्या विश्वासाबद्दल मी ऋणी आहे.
भरत राजपूत यांचा भाजपमध्ये प्रवेश
दरम्यान, शिंदे गटाचे कन्नड ग्रामीण जिल्हाध्यक्ष भरत राजपूत यांनीदेखील आज नाराजी व्यक्त करत भाजपमध्ये प्रवेश केला. त्यांनी मंचावरून काहीही न दडपता आरोपांची सरबत्ती केली. साडेतीन वर्षे मला शिंदे गटात कायम गौण समजले गेले. त्या काळात फक्त भाजपच माझ्या पाठीशी उभी राहिली. आता योग्य व्यासपीठ मिळालंय, त्यामुळेच हा निर्णय घेतला. त्यांच्या प्रवेशामुळे कन्नड तालुक्यातील शिंदे गटाची स्थिती आणखी डळमळीत झाली असल्याचे मानले जात आहे.
