Bharat Gogawale Statement: राज्यातील महायुती सरकारमध्ये सर्व काही सुरळीत असल्याचं चित्र आता धूसर होताना दिसत आहे. भाजपने राबवलेल्या ‘ऑपरेशन लोटस’च्या हालचालींमुळे शिंदेंच्या शिवसेनेत नाराजी उसळली असून त्याचा पहिला परिणाम मंत्रिमंडळ बैठकीवरील बहिष्कारातून दिसून आला. एकनाथ शिंदे यांना वगळता जवळपास सर्वच मंत्र्यांनी बैठकीस हजेरी लावली नाही. या घडामोडींनंतर मुख्यमंत्री आणि शिंदे गटातील मंत्र्यांमध्ये चर्चा सुरू असून तोडगा निघण्याची शक्यता व्यक्त केली जात आहे. दरम्यान, शिंदे गटाचे मंत्री भरत गोगावले यांनी केलेल्या एका वक्तव्याने राजकीय वातावरण पुन्हा तापलं आहे. “थोड्याच वेळात आम्ही एक स्फोट करणार आहोत, तो पाहा,” असा इशारा त्यांनी दिला. मात्र, हा ‘स्फोट’ आमच्या नैसर्गिक युतीतील पक्षांना उद्देशून नसेल, असे त्यांनी स्पष्ट केले.
बैठकीवर बहिष्कार का? या प्रश्नावर गोगावले यांनी, “आम्ही वैयक्तिक कारणांमुळे बैठकीला गैरहजर राहिलो. यामध्ये इतर कोणताही अर्थ काढू नये,” असं स्पष्टीकरण त्यांनी यावेळी दिले. त्यांनी पुढे सांगितले की, चुका दोन्हीकडूनच होतात. टाळी एका हाताने वाजत नाही. मुख्यमंत्री आणि आमचे नेते शिंदेसाहेब या मुद्द्यांवर चर्चा करून मार्ग काढतील. यासोबतच त्यांनी रायगड जिल्ह्यातील राजकारणावर भाष्य करत, राष्ट्रवादीचे सुनील तटकरे यांना स्पष्ट इशारा दिला की, आता रायगडमध्ये जशास तसं उत्तर दिलं जाईल. मात्र, त्यांच्या ‘स्फोटा’चा संबंध या युतीतील पक्षांसोबत जोडू नये, असेही त्यांनी ठामपणे म्हटले.
निधी वितरणाच्या मुद्द्यावरही शिंदे गटाकडून नाराजी सुरू असल्याची माहिती समोर आली आहे. गेल्या वेळी आम्हाला भरभरून निधी मिळाला. पण नव्याने निवडून आलेल्या काहींकडे निधीची कमतरता भासतेय. यावर मुख्यमंत्री आणि शिंदेसाहेब मार्ग काढतील, असे गोगावले म्हणाले.
