Anagar Nagar Panchayat Election: अनगर नगरपंचायतीच्या नगराध्यक्षपदासाठी दाखल झालेल्या उमेदवारी अर्जांच्या छाननीत मोठा बदल घडला आहे. राष्ट्रवादी काँग्रेसच्या उमेदवार उज्ज्वला थिटे यांचा अर्ज आज अपात्र ठरविण्यात आला. त्यांच्या अर्जावर सूचकाची स्वाक्षरी नसल्याची गंभीर त्रुटी निदर्शनास आल्याचे निवडणूक निर्णय अधिकारी सचिन मुळीक यांनी सांगितले. थिटे यांच्या उमेदवारीमुळे १७ नगरसेवक आधीच बिनविरोध निवडून आल्यानेही नगराध्यक्षपदाला निवडणूक लागू झाली होती. नगराध्यक्षपदासाठी एकूण तीन अर्ज दाखल झाले होते. त्यात भाजपकडून माजी आमदार राजन पाटील यांच्या सुना प्राजक्ता पाटील, अपक्ष सरस्वती शिंदे आणि राष्ट्रवादी काँग्रेसच्या उज्ज्वला थिटे यांचा समावेश होता.
थिटे यांची उमेदवारी बाद
छाननी प्रक्रियेला अपेक्षित वेळेपेक्षा अधिक विलंब झाला. दुपारी साडेतीनपर्यंतही कागदपत्रांची तपासणी सुरू होती. राज्यभरातून या छाननीच्या निकालाकडे लक्ष लागले होते. अखेरीस, आवश्यक कागदपत्रे अपूर्ण असल्यामुळे थिटे यांची उमेदवारी बाद करण्यात आल्याचा निर्णय अधिकृतरीत्या जाहीर झाला. दरम्यान, थिटे यांचा अर्ज बाद झाल्यानंतर दुसरे अपक्ष उमेदवार माघार घेण्याची शक्यता व्यक्त केली जात आहे. त्यामुळे भाजप उमेदवार प्राजक्ता पाटील यांच्या बिनविरोध निवडीचा मार्ग मोकळा होणार असल्याची चर्चा आता जोर धरू लागली आहे.
हेही वाचा – इंदापूर नगरपरिषदेच्या नगराध्यक्ष पदासाठी 14 अर्ज तर नगरसेवक पदासाठी 169 अर्ज दाखल
अपक्ष उमेदवार सरस्वती शिंदे यांनी थिटे यांच्या अर्जावर अनेक आक्षेप नोंदवले होते. त्यामध्ये अर्जावरील सूचकाची सही नसणे, मतदार यादीतील प्रभाग व अनुक्रमांक चुकीचा असणे, उमेदवाराच्या वयाचा पुरावा जोडलेला नसणे, सूचकाचा मतदार यादीनुसार अनुक्रमांक चुकीचा असणे, या सर्व मुद्द्यांवर महाराष्ट्र नगरपालिका निवडणूक अधिनियम १९६६ आणि नगराध्यक्षांच्या थेट निवडीसंबंधीच्या नियमांनुसार तपासणी करण्यात आली. त्या अनुषंगाने थिटे यांचा अर्ज अमान्य असल्याचे मुळीक यांनी सांगितले.
