MSBSHSE Chairman: महाराष्ट्र राज्य माध्यमिक व उच्च माध्यमिक शिक्षण मंडळाच्या इतिहासात प्रथमच सनदी अधिकाऱ्याची नियुक्ती करण्यात आली आहे. IAS अधिकारी त्रिगुण कुलकर्णी यांना राज्य मंडळाच्या अध्यक्षपदाची जबाबदारी अधिकृतपणे देण्यात आली असून, या नियुक्तीमुळे राज्य मंडळाच्या कामकाजात नवीन प्रशासकीय दृष्टीकोनाची भर पडणार आहे.
कोण आहेत त्रिगुण कुलकर्णी?
कुलकर्णी हे सध्या यशवंतराव चव्हाण विकास प्रशासन प्रबोधिनी (यशदा) येथे उपसंचालक पदावर कार्यरत आहेत. राज्य मंडळ ही शिक्षण विभागाखालील स्वायत्त संस्था असून, महाराष्ट्रातील दहावी आणि बारावीच्या सर्व परीक्षा घेण्याची प्राथमिक जबाबदारी ही मंडळाचीच आहे. आजवर राज्य मंडळाच्या अध्यक्षपदी महाराष्ट्र लोकसेवा आयोगाद्वारे नियुक्त शिक्षण सेवा अधिकाऱ्यांची निवड केली जात असे. या परंपरेनुसारच मागील अध्यक्ष शरद गोसावी यांनी तीन वर्षे कार्यभार सांभाळल्यानंतर प्राथमिक शिक्षण संचालकपदी बदली स्वीकारली.
हेही वाचा – Pune Petrol Pump : पुणेकरांसाठी महत्वाची बातमी! संध्याकाळी ७ नंतर पेट्रोल पंप राहणार बंद; काय आहे कारण?
गेल्या वर्षभरापासून त्यांनी राज्य मंडळाच्या अध्यक्षपदाचा अतिरिक्त कार्यभारही हाताळला होता. मात्र, यावेळी शासनाने नव्या पद्धतीने निर्णय घेत IAS अधिकाऱ्याला राज्य मंडळाच्या प्रमुखपदी नेमले आहे. त्यामुळे राज्य मंडळाच्या ५०+ वर्षांच्या इतिहासात हा पहिल्याच बदल ठरला आहे.
राज्य मंडळाच्या आगामी जबाबदाऱ्या
फेब्रुवारी–मार्च 2025 दरम्यान होणाऱ्या 10वी आणि 12वीच्या परीक्षांची जबाबदारी नव्या अध्यक्षांकडे असेल. दरवर्षी साधारण 32 लाख विद्यार्थी या परीक्षा देतात, तर जुलै–ऑगस्टमध्ये फेर परीक्षा आयोजित केली जाते. हे परीक्षाकेंद्र पुणे, नागपूर, मुंबई, छत्रपती संभाजीनगर, कोल्हापूर, नाशिक, अमरावती, लातूर आणि कोकण या नऊ विभागीय मंडळांमध्ये विखुरलेले आहेत. राज्य मंडळाने नुकतेच 2025 च्या परीक्षांचे वेळापत्रक जाहीर केले असून, आता या सर्व प्रक्रियेचे नेतृत्व IAS अधिकारी त्रिगुण कुलकर्णी करणार आहेत.
