वॉशिंग्टन : मिस मेक्सिकोच्या फातिमा बॉशने मिस युनिव्हर्स २०२५ चा किताब जिंकला आहे. भारताच्या मनिका विश्वकर्मा टॉप १२ मध्ये स्थान मिळवू शकली नाही. परंतु, तिच्या लूकची आणि बुद्धिमत्तेची खूप प्रशंसा झाली. थायलंडची स्पर्धक प्रविणार सिंग मिस युनिव्हर्समध्ये पहिली रनर-अप ठरली. तर व्हेनेझुएला दुसरी रनर-अप होती आणि फिलीपिन्स तिसरी रनर-अप होती.
भारतातील २२ वर्षीय मनिका विश्वकर्माने विविध देशांतील १०० हून अधिक ब्युटी क्वीनशी स्पर्धा केली. मात्र, फक्त टॉप ३० मध्येच पोहोचली. मिस युनिव्हर्स २०२५ च्या अंतिम फेरीत चिली, कोलंबिया, क्युबा, ग्वाडेलूप, मेक्सिको, प्यूर्टो रिको, व्हेनेझुएला, चीन, फिलीपिन्स, थायलंड, माल्टा आणि कोट डी’आयव्होअर येथील सुंदरींचा समावेश होता. मिस युनिव्हर्स २०२४ व्हिक्टोरिया केजर थेलविगने मिस युनिव्हर्स २०२५ विजेती फातिमाचा मुकुट घातला. १६ नोव्हेंबर २०२४ रोजी डेन्मार्कच्या व्हिक्टोरिया केजर थेलविगला मिस युनिव्हर्सचा मुकुट घातला गेला आणि ती हा किताब जिंकणारी पहिली डॅनिश महिला ठरली.
१९५२ मध्ये स्थापन झालेली मिस युनिव्हर्स ऑर्गनायझेशन ही जगभरातील महिलांसाठी एक व्यासपीठ आहे जी स्पर्धकांमध्ये नेतृत्व, शिक्षण, सामाजिक प्रभाव, विविधता आणि वैयक्तिक विकासाला प्रोत्साहन देते. या वर्षीची स्पर्धा हेराफेरी आणि वादाच्या आरोपांनी भरलेली होती. शोचे जज आणि संगीतकार ओमर हार्फोचे यांनी अंतिम सामन्याच्या फक्त तीन दिवस आधी राजीनामा दिला होता. त्यामुळे या शोची चर्चाही कायम आहे.
