Akola Crime News: अकोल्यामध्ये राष्ट्रवादी काँग्रेस (अजित पवार गट) च्या विद्यार्थी आघाडीतील महानगरप्रमुख वैभव घुगे यांनी रेल्वेखाली उडी घेत आत्महत्या केल्याची धक्कादायक घटना समोर आली आहे. जुना आरटीओ रोड परिसरातील रेल्वे ट्रॅकवर हा प्रकार घडला असून घटनेनंतर परिसरात खळबळ उडाली आहे. वैभव घुगे हे राष्ट्रवादीचे नेते व मंत्री धनंजय मुंडे यांचे निकटवर्तीय कार्यकर्ते म्हणून ओळखले जात होते. त्यांच्या आत्महत्येमागील कारण अद्याप स्पष्ट झालेले नाही. तथापि, प्रारंभिक माहितीनुसार कर्जबाजारीपणामुळे त्यांनी हे टोकाचे पाऊल उचलले असावे, अशी शक्यता व्यक्त केली जात आहे.
दरम्यान, घटनेची माहिती मिळताच पोलिसांनी घटनास्थळी धाव घेतली. पोलिसांनी त्यांचा मृतदेह शवविच्छेदनासाठी पाठवला आहे. राष्ट्रवादी काँग्रेसच्या स्थानिक वर्तुळात या घटनेने शोककळा पसरली असून कार्यकर्ते आणि पदाधिकारी मोठ्या संख्येने घटनास्थळी दाखल झाले. धावत्या ट्रेनसमोर उडी घेत घुगेंनी आयुष्य संपवल्याचे प्रत्यक्षदर्शींच्या माध्यमातून समोर आले आहे.
हेही वाचा –बार्शीत वरिष्ठाच्या जाचाला कंटाळून ग्रामसेवकाची गळफास घेऊन आत्महत्या
राजकीय क्षेत्रातही या घटनेनंतर मोठी चर्चा रंगली असून पोलिसांपुढे आत्महत्येचे नेमके कारण शोधण्याचे आव्हान आहे. तथापी, कुटुंबीयांवर दु:खाचा डोंगर कोसळला असून घटनेनंतर हळहळ व्यक्त होत आहे. पोलिसांनी तपास सुरू केला असून सर्व शक्यता तपासल्या जात आहेत.
