KEM Hospital Rename: मुंबईची आरोग्यवाहिनी आणि ऐतिहासिक वारसा असलेले किंग एडवर्ड मेमोरियल (KEM) रुग्णालय आता एका नव्या नावाने ओळखले जाण्याची शक्यता आहे. राज्याचे मंत्री मंगलप्रभात लोढा यांनी हे नाव बदलून ते अधिक भारतीय संस्कृतीशी सुसंगत असावे, अशी आग्रही मागणी मुंबई महानगरपालिकेकडे केली आहे. या संदर्भात त्यांनी पालिका प्रशासनाला अधिकृत पत्र लिहून प्रक्रियेला गती देण्याचे निर्देश दिले आहेत.
काय आहे प्रस्तावित नवीन नाव?
मंत्री लोढा यांनी पत्रात सुचवलेल्या प्रस्तावानुसार, रुग्णालयाचे नाव “कौशल्य श्रेष्ठ एकलव्य स्मारक रुग्णालय” असे करण्यात यावे. विशेष म्हणजे, या नावामुळे रुग्णालयाचे लोकप्रिय संक्षिप्त रूप ‘केईएम’ (KEM – Kaushalya Shrestha Eklavya Memorial) हे पूर्वीसारखेच कायम राहील, असा तर्कही त्यांनी मांडला आहे. ब्रिटिशकालीन गुलामगिरीची ओळख पुसून भारतीय अस्मितेचे नाव देणे हा यामागचा मुख्य उद्देश असल्याचे त्यांनी म्हटले आहे.
दुसऱ्यांदा रेटली मागणी
यापूर्वी जानेवारी २०२६ मध्ये एका कार्यक्रमादरम्यान लोढा यांनी ही संकल्पना मांडली होती. आता दुसऱ्यांदा आणि अधिकृत पत्राद्वारे पाठपुरावा केल्याने प्रशासकीय हालचालींना वेग आला आहे. १९२६ मध्ये ब्रिटनचे राजे किंग एडवर्ड (सातवे) यांच्या स्मरणार्थ या रुग्णालयाची स्थापना झाली होती. आता १०० वर्षांनंतर या ऐतिहासिक नावाचा कायापालट करण्याचा प्रस्ताव समोर आला आहे.
राजकीय आणि सामाजिक पडसाद उमटणार?
केईएम रुग्णालय हे केवळ उपचार केंद्र नसून ती मुंबईची एक जागतिक ओळख आहे. वारसा प्रेमी आणि काही राजकीय पक्षांनी या ऐतिहासिक नावाशी छेडछाड करण्यास विरोध दर्शविला आहे. तज्ज्ञांच्या मते, नावापेक्षा रुग्णालयातील सुविधा आणि डॉक्टरांच्या कामावर लक्ष देणे अधिक गरजेचे आहे. मुंबई महानगरपालिकेच्या अखत्यारीत येणाऱ्या या रुग्णालयाच्या नामांतरावर आता प्रशासन आणि सत्ताधारी काय भूमिका घेतात, याकडे मुंबईकरांचे लक्ष लागले आहे.
