मुंबई : सध्या शेअर मार्केटमध्ये गुंतवणूक करणाऱ्यांची संख्या वाढताना दिसत आहे. त्यात जर तुम्ही आयपीओ गुंतवणुकीची योजना आखत असाल, तर ही बातमी तुमच्यासाठी खास आहे. ऑनलाईन कपडे कंपनी Meesho आपला आयपीओ लाँच करणार आहे. ही कंपनी ५००० कोटींपेक्षा जास्त किमतीचा हा आयपीओ पुढील महिन्याच्या सुरुवातीला ३ डिसेंबर रोजी उघडणार आहे.
ऑनलाईन कपडे कंपनी मिशोचा आयपीओ ३ डिसेंबर रोजी किरकोळ गुंतवणूकदारांसाठी खुला होईल आणि ५ डिसेंबरपर्यंत तीन दिवसांसाठी बोली स्वीकारल्या जातील. सॉफ्टबँक-समर्थित ई-कॉमर्स प्लॅटफॉर्म मिशोने आपल्या आयपीओसाठी किंमत रेंज देखील जाहीर केली आहे, जी प्रति शेअर १०५ ते १११ अशी असणार आहे. मिशो आपल्या इश्यूद्वारे बाजारातून ५४२१.२० कोटी उभारण्याची योजना आखत आहे. मिशो आयपीओ अंतर्गत, कंपनी गुंतवणूकदारांना ४२५० कोटींचे नवीन शेअर्स जारी करेल, तर प्रवर्तक ऑफर फॉर सेल (ओएफएस) द्वारे १०.५५ कोटी शेअर्स विकतील.
आयपीओचे व्यवस्थापन कोटक महिंद्रा कॅपिटल कंपनी, जेपी मॉर्गन इंडिया, मॉर्गन स्टॅनली इंडिया कंपनी, अॅक्सिस कॅपिटल आणि सिटीग्रुप ग्लोबल मार्केट्स इंडिया करतील, तर केफिन टेक्नॉलॉजीज लिमिटेडची रजिस्ट्रार म्हणून नियुक्ती करण्यात आली आहे.
