Indapur Voting Percentage: इंदापूर नगरपरिषदेच्या पंचवार्षिक सार्वत्रिक निवडणुकीमध्ये ९७५० पुरुष, १० हजार ८३ , इतर ४ एकूण १९ हजार ८३७ मतदारांनी मताचा अधिकार बजावला असून सरासरी मतदान ७९. ८९ टक्के झाले आहे. इंदापूर नगरपरिषद सार्वत्रिक पंचवार्षिक निवडणुकीसाठी आज सकाळी साडेसात वाजण्याच्या सुमारास मतदान प्रक्रियेस प्रारंभ झाला. राष्ट्रवादी काँग्रेस अजित पवार पक्षाचे उमेदवार भरत शहा, कृष्णा-भिमा विकास आघाडी चे उमेदवार प्रदीप गारटकर यांनी पहिल्या प्रहरात मतदानाचा अधिकार बजावला. नगरपालिकेचे निवडणूक जवळपास तीन वर्षांपेक्षा अधिक काळ लांबली असल्यामुळे मतदारांमध्ये कमालीची उत्सुकता दिसून आली. सकाळी साडेसात वाजल्यापासून मतदारांनी मतदान केंद्रावर रांगा लावल्या होत्या.
सकाळी साडेसात ते साडेनऊ वाजेपर्यंत ९.७५ टक्के मतदान झाले. साडेनऊ नंतर मतदान केंद्रावर मतदारांचा वेग वाढला. साडे अकरा पर्यंत २४.९५ टक्के मतदान झाले. मतदानाचा वेग वाढतच गेला दुपारी दीड वाजेपर्यंत ४३.१८ टक्के पर्यंत पोहचला. साडेतीन वाजता ही टक्केवारी ६०.४१ पर्यंत गेली.
इंदापूर शहरातील परगावी नोकरीसाठी असणाऱ्या मतदारांना मतदानासाठी आणण्यासाठी कृष्णा भीमा विकास आघाडी व राष्ट्रवादी काँग्रेस पक्षातील पदाधिकाऱ्यांच्या कडून मोठ्या प्रमाणात प्रयत्न केले गेले. त्यामुळे सकाळी सात ते दहा या दरम्यान चा मतदारांचा आकडा वाढला. मतदानाचा हक्क बजावून ही मंडळी आपल्या कामावर परतली.
मतदान केंद्रावर मतदानाचा हक्क बजावण्यासाठी आलेल्या मतदारांना मतदान केंद्राच्या खोलीपर्यंत जाईपर्यंत उमेदवार मतदान करण्याचे आवाहन करत असल्याचे निदर्शनास आले. यामुळे काही मतदान केंद्रावर दोन गटांमध्ये किरकोळ वादावाद झाली. काही मतदान केंद्रावर मशीनमध्ये चिन्ह दिसत नसल्याची तक्रारही करण्यात आली. इंदापूर शहरातील २७ मतदान केंद्रावर दुपारी साडेतीन वाजेपर्यंत ७३०८ पुरुष तर ७६८८ महिलांनी मतदानाचा हक्क बजावला. २४ हजार ८२९ मतदारांपैकी १५ हजार मतदारांनी मतदान केले.
